WEB a firma acuerdo cu compania pa reemplaza motor RECIP cu a daña 8 luna pasa

ORANJESTAD (AAN): E siman aki a tuma luga e firmamento di e acuerdo entre WEB Aruba y Wärtsilä Finland Oy pa traha riba e proyecto yama “RECIP Phase 3 DG-7 Replacement”.

   E acuerdo ta encera reemplaso di Motor DG-7 di planta RECIP Phase 3, cual a wordo afecta durante e candela dia 16 di april 2024. E acuerdo ta inclui entrega di un motor y un generador nobo y reparacion di e parti afecta di e structura di e Engine Hall di Motor DG-7. E reemplaso ta necesario pa reestablece e capacidad di produccion di energia di RECIP Phase 3 bek na su capacidad original, prome cu e incidente ocasiona pa e candela.

   Cu planta RECIP Phase 3 bek na su capacidad original, esaki ta yuda aumenta e “spinning reserve” di WEB pa asina por cumpli cu e demanda di energia actual y creciente na nos isla.

   Alabes, cu motor DG-7 bek den servicio, esaki lo yuda reduci uzo costoso di e planta mobil di 20 MW di ‘Bredenoord’ cu a cuminza opera na Augustus 2024.

   E proyecto tin un duracion di mas o menos 10 luna y ta planea pa finalisa pa fin di September 2025.