WEB a anuncia aumento di tarifa di awa entrante Dialuna awor

The content originally appeared on: Diario

Esnan cu gasta entre 0 cu 6 m3 di awa ta aumenta di 4.55 pa 6.3 florin

ORANJESTAD(AAN): Diabierna atardi ta parce cu e beis di hopi hende na Aruba a daña, otronan a keda babuca, y a keda mira rond y no por a kere loke nan a tende.

   Esey a socede, ora cu tanto WEB Aruba NV y NV Elmar a anuncia un aumento drastico di tarifa entrante Dialuna 1 Augustus 2022.

   A yega pues un fin despues di 2 aña y 7 luna cu Aruba a keda paga e mesun tarifa di awa y coriente (desde 1 Januari 2020).

   Conferencia: Diabierna atardi a tuma lugar un conferencia di prensa relaciona cu ahustacionnan den e prijs di coriente y awa, unda cu representantenan di WEB Aruba NV, Utilities Aruba NV, y NV Elmar tabata presente pa duna un splicacion.

   Director di Utilities Anthony Rojer a cuminza na bisa cu e pandemia a siña nos hopi cos.

“Nos a wordo enfrenta cu un situacion inespera pa loke ta e guera entre Ukraine y Rusia y esaki a ocasiona un crisis di energia”.

E prijs di petroleo a cuminza fluctua for di aña pasa y a base di esey nos mester a mantene nos prijsnan pa pueblo di Aruba y tambe haci nos ehercicionan cu Gobierno y empresanan pa busca un balanza con pa tene e prijsnan mas accesible pa comunidad, segun Rojer.

Director di WEB Alfredo Koolman tambe a hiba a palabra y el a splica cu e aumento di prijs di petroleo tabata tin consecuencianan pa e compania y pesey a cuminza purba baha e gastonan den WEB.

Un di e medidanan cu e compania a wordo tuma tabata cu a vries e salarionan di e empleadonan y en total a logra baha e gastonan total cu 6.5 miyon florin.

“Nos a dicidi tambe cu nos lo absorba gastonan pa 7 luna, unda cu nos a tene cuenta cu e hecho cu nos lo tin un entrada hopi mas abao”.

Nos a haci uso di nos reservanan y nos a yega un punto critico di nos compania, cu a pone cu despues di hopi evaluacion cu e stakeholders nos a yega na e parti di ahuste di e tarifanan na un manera responsabel, segun Koolman.

El a indica cu mester a garantiza stabilidad financiero di WEB Aruba NV y garantiza cu e produccion y suministro di awa y coriente di nos isla.

Segun e director di WEB, den ultimo decada y mey a tuma medidanan pa baha consumo di petroleo na e compania.

“Desde 2005 nos a reduci e barinan pa dia di 6000 pa 3000”, segun Koolman.

El a indica cu cuminzando 1 di Augustus ta bay tin un ahuste den e tarifa, unda cu e prijs entre 0 cu 3 meter cubico y entre 4 cu 6 meter cubico ta aumenta di 4.55 florin pa 6.30 florin.

E prijs di 7 pa 12 meter cubico ta aumenta di 6.25 florin pa 8.25 florin.