Wardacosta y Polis a gara grupo di indocumenta cu a subi tera na Curaçao

The content originally appeared on: Diario

Buskeda a dura henter dia

WILLEMSTAD: Oficialnan di Wardacosta di Caribe Hulandes, hunto cu Polis di isla di Curaçao, a logra pone man riba un grupo di indocumentadonan na Oostpunt di e isla.

   Tabata mainta cu Wardacosta a ricibi tip, cu un boto tipo yola a subi barancanan na Oostpunt di e isla, den area di Hambrak. Mesora Wardakosta a meld e informacion aki na Cuerpo Policial di Curaçao, y hunto autoridadnan a manda patruyanan di Wardacosta na tera, hunto cu miembronan di Warda di Polis di Montaña, unidadnan di U.S.T., y e helicopter di Wardacosta pa vigila e sector.

   Durante e buskeda, cu a dura henter dia, riba tera a detene den oranan di mainta 6 hende indocumenta. Den e sector a bin topa tambe un tas, den cua tabatin arma di candela.

   Den oranan di atardi pa anochi Wardacosta y Polis a laga e helicopter y patruyanan keda vigila den e area, y asina a bin topa 7 indocumenta mas.

   En total a detene 13 persona indocumenta, di cual 7 hende homber y 6 hende muhe. Un di e hendenan muhenan ta trata di un menor di edad.  Ta trata di 12 persona di nacionalidad Venezolano y 1 Colombiano.

   Den e grupo di hende indocumenta aki, tin persona cu ya caba den pasado a keda deporta for di e isla.  Tambe a gara un muhe, kende den pasado a yega di wordo sentencia pa traficacion di hende.

   Tur e personanan aki a ser entrega na Departamento di Inmigracion Curaçao, cu lo continua cu e investigacion den e caso aki.