Voz di mucha victima di abuso sexual lo resona dilanti Huez!

The content originally appeared on: Diario

Husticia lo haci uso di e uno di e armanan mas poderoso cu e tin

*Dimension nobo na casonan penal pa abuso di mucha den Corte

*Mucha lo haya arma directo contra atentador di su porvenir 

ORANJESTAD (AAN) — Mientras Aruba ta prepara pa culminacion di su Carnaval 70, uno di e peligernan mas grandi cu ta sconde durante celebracionnan publico, ta bay topa cu castigo pisa pa criminalnan.

Manera DIARIO a presenta na su lectornan algun tempo pasa, sector di Husticia ta traha duro riba cambionan den e Codigo Penal, den cual castigonan pa actonan criminal, ta wordo impone.

Un parti di e cambionan aki, cu sigur lo wordo ricibi cu aplauso grandi cerca poblacion di Aruba ta, castigonan pisa pa casonan di abuso sexual.

Atendiendo cu e topico aki, DIARIO a mustra riba e hecho cu ya castigonan pa maltrato y abuso sexual, a cuminsa subi y ta contene un advertencia na mundo criminal.

Uno di e adaptacionnan mas importante di Codigo Civil lo bira e posibilidad pa e voz di muchanan resona directamente den sala di Corte, ora ta trata casonan penal contra sospechosonan di abuso sexual y maltrato di mucha.

Mundialmente mas y mas atencion ta wordo duna, na e abuso enorme cu sigur sistemanan nobo di convicencia, ta nifica pa mucha inocente, cu ta bira victima di mente perverso.

Na nivel internacional, Husticia a cuminsa ta uza arma fuerte di castigo contra abuso creciente di menornan di edad, cu den e mundo di cambio moral, ta bira victima di abusadornan cobarde cu ta haci personanan mas debil, nan victima.

Di acuerdo cu e informenan ricibi, pronto na Aruba lo wordo anuncia cu Codigo Penal a cambia di tal forma, cu e mucha mes por splica Huez den sala di Corte, kico tabata su dolor agonizante como victima di abuso sexual y maltrato.

Informantenan ta splica cu ya no ta riba papel Huez lo por tuma nota di sucesonan, pero tambe pa medio di declaracionnan di menornan di edad, cu lo tin tur oportunidad pa splica, cu nan palabra, kico a pasa cu nan persona ora nan a cay den man di criminalnan.

Experencianan rond mundo ta mustra, cu no tin mihor interpretacion pa e dolor di un persona cu a wordo abusa of maltrata, cu e declaracionnan di e propio persona cu ta relata con su bida y futuro a wordo kibra dor di malhechornan cu como castigo den caso penal, lo mester pone placa riba mesa pa compensa pa un parti tur e resultadonan cu nan accionnan perverso, tabata tin pa e mucha riba tur tereno.

Si por wordo proba cu e dañonan material y no material cu e mucha a sufri, ta surpasa 50 Mil Florin, mester cuminsa un caso civil pa exigi un suma mas halto.

E hecho cu mucha ta wordo representa den sala di Corte pa otro persona, ta deshaci di e emocion enorme, cu a bira parti di e mucha, cu den ladronicia di su libertad personal, a wordo priva di su derechonan mas importante cu ta cuminsa cu respet pa su bida y e hecho cu e ta hende.

E sufrimento di e mucha, ta surpasa gastonan cu mester a wordo haci pa tratamento mescos cu por ehempel asistencia special pa su educacion y su relacionnan den bida diario cu hende.

Manera informantenan a trece dilanti pa DIARIO, hamas por recompensa un mucha pa e trauma cu abuso sexual y maltrato a laga atras den su persona, loke por wordo expresa den palabra cu sy mayornan of otro representante den sala di Corte por trece dilanti, pero hamas por wordo interpreta cu e realidad di e mucha como victima di horor.

Cu un mundo cu un crecemento enorme di casonan di violacion y abuso sexual y maltrato, e porta cu ta habri pa muchanan den e mundo moderno, ta na su lugar segun tur informante. Te awor ta pensa cu e mucha por practica mentira, mientras ningun persona por splica mihor cu e mucha, kico tabata su desesperacion y ta keda dolor y angustia, cu ta sumamente dificil pa supera.

Segun informantenan a corto plazo e Codigo Penal nobo lo mira luz y lo contene cambionan cu ta di acuerdo cu e oposicion di comunidad contra crimennan horibel cu a destrui porvenir y bida di mucha inocente.