Vice-President di Venezuela a yega Den Haag pa defende e reclamo teritorial riba Esequibo

The content originally appeared on: Diario

DEN HAAG: E vice-president di Venezuela, Delcy Rodriguez, a yega Hulanda pa entrega dilanti Corte Internacional di Husticia (CIH) e notanan di Venezuela riba e controversia teritorial cu Guyana riba Esequibo.

   “Cumpliendo cu e mandato di pueblo dia 3 di December, nos a yega Hulanda pa entrega e berdad historico di Venezuela, su derecho no-renunciabel pa e teritorio di Guayana Esequiba,” ta loke Delcy Rodriguez a bisa despues di pone un video riba social media.

   El a enfatisa cu nan tin e mihor abogadonan prepara pa defende e posicion historico di Venezuela, sinembargo, el a adverti cu Corte Internacional di Husticia no tin hurisdiccion pa resolve e controversia teritorial, debi cu e pais “nunca a duna su consentimento.”

   “Tin un solo instrumento cu ta e acuerdo di Ginebra pa resolve e controversia teritorial aki, y nos mester dedica nos mes na dje y defende, manera cu pueblo di Venezuela a haci esey dia 3 di December,” Rodriguez a splica den e video.

   El a enfatisa cu “ni ExxonMobil, ni Southern Command, ni CIA, ni e gobierno poppenkast di Guyana lo por bay deal cu pueblo Venezolano,”cu ta e motibo pakico acompaña pa un grupo di experto, nan ta cla pa laga sin base e argumentonan di Guyana riba e supuesto derechonan cu nan tin riba e Esequibo.