Venezolanonan na Aruba a protesta y exigi ‘eleccion liber’ na Venezuela

The content originally appeared on: Diario

ORANJESTAD (AAN): Migrantenan venezolano a aglomera Diasabra atardi na Plaza Bolivar na Playa,

como parti di e protesta mundial cu a wordo convoca pa e lider di oposicion Maria Corina Machado, na mas di 50 ciudad rond mundo, pa asina exigi ‘eleccionnan liber’ na Venezuela.

   Laura Luces e atardi aki a indica cu e ta representa “Mundo Con Venezuela”, y a splica cu na Aruba tambe e venezolanonan a exigi pa permiti inscribi un candidata unitario di oposicion venezolano pa eleccion presidencial di dia 28 di Juli venidero, despues cu diripiente Corte Superior a duna di conoce cu Maria Corina Machado no mag di participa, debi na e inhabilitacion poni contra dje, y despues a blokea tambe e candidatura di Corina Yoris, un dama academico di 80 aña cu a wordo selecciona como su reemplazo.

   Rond mundo, nan a exigi pa comunidad internacional keda pone presion riba Nicolas Maduro pa pone compronde cu e tin di cumpli cu e Acuerdo di Barbados, y permiti cu oposicion democratico ta postula libremente su candidato.  E candidato di oposicion no por wordo escogi door di Maduro, pasobra esey lo no ta eleccion, sino un farsa completo.

   Pa colmo awor Venezuela ta bin cu monton di rekisito pa e votadornan nobo den exterior por registra pa e eleccion.  Por ehemplo na Aruba mes den pasado, cu djis bo cedula di identidad den man, hunto cu e papel di Censo di 5 Florin, tabata suficiente pa pidi e cambio di adres of pa inscribi pa prome biaha.

   Awor na 2024 esey a cambia, como cu ademas di e cedula y e papel di 5 Florin di Censo, nan ta pidi e cedula di Aruba, e paspoort Hulandes y paspoort di Venezuela.  Y ta exigi pa e tres ultimo documentonan aki ta valido.

   E problema ta cu hopi venezolano tin nan cedula di Aruba, pero e cedula ey ta wordo duna conforme cu bo tin bo permiso di Dimas.  Si e permiso di Dimas a sali di Maart te cu siguiente Maart, bo cedula lo ta valido te cu Maart of Juni.  Si bo tin cedula te cu Juni, ta bin resulta cu nan no ta acepta esey tampoco.

   Tur esey ta blokeonan cu ta wordo imponi pa stroba venezolanonan na Aruba e chens di por eherce nan derecho di vota den eleccion presidencial.  Esey ta pone cu e ora ey lo no tin eleccion legitimo, ni eleccion liber, ni imparcial.