Vehiculo a baha di caminda y bolter riba baricada di beton riba Green Corridor

The content originally appeared on: Diario

Accident dilanti Aeropuerto


Vehiculo a keda gekentel cu 2 adulto y dos mucha envolvi 

ORANJESTAD (AAN): Un accidente grave a sosode diamars atardi algo prome cu 1:30 pm riba Green Corridor, un poco pariba di Spiral Rotonde dilanti Aeropuerto.

   Un vehiculo SUV Honda Pilot a caba di sali di e rotonde aumentando velocidad pa bay direccion San Nicolas, y diripiente chauffeur di e vehiculo A-18933 a kita pa un otro auto, y asina a perde control riba e stuur, y e vehiculo a bay den scual, baha for di banda drechi di caminda pa dal den e muraya di beton banda zuid di caminda.

   E vehiculo a bay halto, bolter, y keda gekentel cu parti di e motor ainda riba e baricada di beton.

   E accident aki instantaneamente a ocasiona stagnacion di trafico na ambos banda di Green Corridor, ora chauffeurnan tabata slow-down pa mira con hendenan tabata sali for di e vehiculo di banda.  Varios liquido tabata sali for di e motor di banda, y na prome instante a mira huma tambe.  Pero esey tabata djis e motor cu despues a paga.

   Central di Polis a manda diferente unidad rumbo pa e area, y a notifica Centro di Alarma pa manda Ambulans tambe.  E prome unidad di Polis cu a yega, a raporta cu ningun hende a keda pega den e vehiculo.

   Den e Honda Pilot color preto tabatin 2 persona y tambe dos menor di edad cu a caba di wordo busca na scol y ta rumbo pa cas.

   Dos unidad di Ambulans a yega, y a usa un pida sombra bao palo di kwihi como ‘triage’ pa asina analisa e heridonan.  Despues di stabilisa nan, a hiba nan tur pa Hospital.

   Na final ta Takelwagen a bay pa kita e SUV for di riba e baricada di beton.