Varios pasahero kehando cu tin problema cu computernan pa ‘ED Card’

The content originally appeared on: Diario

ORANJESTAD (AAN): Tur pasahero cu ta bay subi avion rumbo pa Aruba, pa awor ta na altura cu di antemano nan tin di bay riba Internet,

subi un website oficial pa asina yena electronicamente e formulario di Inmigracion di Aruba, cu yama ‘ED Card’.

   Esaki ta algo cu a reemplaza e tradicional formulario cu pasaheronan tabata yena den pasado cu tabata yama “Embarkation Disembarkation Card” cu den pasado hopi biaha pasaheronan tabata yena esaki cu pen abordo di avion, of prome cu nan sali di e isla.

   Awor e proceso ta electronicamente, y bo tin di yena e Aruba Online ED Card aki sea bo ta turista of residente.  Si acaso bo ta residente, bo tin di hasta skirbi number di e zorgpas di bo AZV.

   Na final ora cu bo yena tur formulario y no tin problema, lo bo haya un permiso pa subi avion y start e viahe rumbo pa Aruba.  Pues e ta un proceso pa haya permiso pa viaha rumbo pa Aruba.

   Sinembargo pa algun dia caba varios pasahero ta kehando riba Social Media, cu e website di Aruba Online ED Card ta stagna y no ta dunando nan e proceso pa imprimi nan ED Card cu tin e simbolo berde y e QR-Code riba dje.

   E ta algo cu a cuminsa presenta su mes mas y mas, y ora cu nan manda un email pa pidi yudansa, ningun hende encarga cu e Aruba Online ED Card no ta contesta nan tampoco.

   Y ora di yega pa check-in na e aerolinea, ata diripiente e check-in agent no ta acepta un screenshot di bo smartphone di bo ED Card.  Aparentemente tin algun aerolinea cu no ta acepta screenshot, y ta exigi prueba riba papel.

   Pero pa hopi hende, e dianan aki e prueba no ta imprimiendo riba papel.  Tin un problema cu e server di computer cu no ta permiti nan haci esey.

   Ta di spera cu e instancia concerni lo bay check kico ta pasando y evita cu mas hende ta haya problema cu e proceso aki.