Varios gang a converti Port-au-Prince den un veld di bataya

The content originally appeared on: Diario

PORT-AU-PRINCE: Enfrentamentonan entre gangnan a paraliza y mancha tur na sanger, un sector di Port-au-Prince cu ta e capital di Haiti,

di cual poblacion ta sufri un inflacion espantoso, y un scarcedad critico di combustible cu ta complica e crucial yudanza humanitario.

   For di Diabierna dos siman pasa caba, bo por tende tiro ta los henter dia na Cité Soleil, un pueblo pober y cu demasiado habitante den un parti di Port-au-Prince, unda e bandanan rival ta enfrenta otro, mientras cu Polis cu tin scarcedad di personal y equipo, ta djis keda na banda ta wak.

   Den e ultimo siman so, e atakenan a laga por lo menos 89 morto, cu 16 hende desapareci, y 74 herido di bala of cuchiu, segun e Network Nacional di Defensa di Derechonan Humano.

   Den e barionan di choza y carton cu a wordo crea den e ultimo cuatro decadanan, miles di famia no tin ningun otro opcion cu djis keda paden di nan choza, sin por haya awa ni cuminda.

   Algun victima ta keda herida of muri di balanan cu accidentalmente ta desvia y impacta nan, hasta si bo ta den bo cas di cual algun ta traha djis cu zink.  Pa colmo, Ambulans no ta autoriza pa core den e zona pa bay yuda e heridonan.

   Asina mes, un clinica cerca di Cité Soleil ta atende un promedio di 15 herido pa dia, desde Diabierna siman pasa.  Y si bo core riba e unico caminda cu ta bay pa e bario, bo ta haya cadavernan den estado di descomposicion, of kima banda di caminda.  Kizas ta hende cu a wordo mata den e enfrentamentonan, of tratando di huy y a wordo bati.  E lugar aki ta un berdadero veld di bataya.

   E enfrentamentonan mortal aki entre e gang, ta afecta actividad na henter e capital.  Esey ta debi cu na Cité Soleil tin e terminal petrolero cu ta alimenta Port-au-Prince y e parti nort di Haiti.  Ni un druppel di combustible bo no por haya na Gasoline Station na e capital, y pesey prijs di combustible riba mercado preto a subi drasticamente.

   Varios Motorcycle-Taxi cu a fada di e situacion, a tene un protesta Diaranson cu varios baricada poni riba diferente caminda di Port-au-Prince.  Unico trabao cu nan ta haciendo aworaki ta viahe cortico den pueblonan.

   Na e capital mes, hendenan tin miedo di bay traha, of haci trabao normal debi cu tin e riesgo di wordo secuestra.  Pa mas di dos aña caba, e gangnan a multiplica e secuestronan na e ciudad, y nan ta ataca personanan di tur origen socio-economico, y di cualkier nacionalidad.

   Como cu e delincuentenan aki no ta hayando ningun castigo, e gangnan a intensifica nan actividadnan den ultimo simannan.  Na Juni so por lo menos 155 secuestro a wordo registra, compara cu luna di Mei unda tabatin 118 caso.