Variante Omicron tey y ta bezig ta wordo transmiti na Aruba

The content originally appeared on: Diario

Casonan constata cerca turista y hende local tambe: — ORANJESTAD (AAN) – Den e conferencia di prensa di Gobierno, Dialuna di e siman aki, Prome Minister Evelyn Wever-Croes, Ronella Croes director di ATA y docter Wilmer Salazar a duna un update tocante e situacion di Covid-19 na Aruba.

            Prome Minister a cuminza bisando cu gobierno a yama e conferencia di prensa den e Siman di Pasco aki, pa comunidad pone un poco mas di atencion na e situacion di Covid-19.

E dignatario a bisa cu di Diadomingo pa e Dialuna aki, gobierno tin noticia nobo pa duna tambe. “Nos a constata e prome casonan di Omicron na Aruba, y esaki ta pone nos den preparacion pa e ola number 5. E personanan a wordo getest  positivo pa Covid, si mi no ta hera, cuater dia pasa (dia 16 di December) y Diadomingo a constata cu esaki ta ómicron. Naturalmente, ta trata di personanan cu ta bin di exterior como turista, pero tambe di personanan cu no tin historia di biahe. Esaki ta bisa nos cu e variante Omicron tey, y cu ta bezig ta wordo traspasa den nos comunidad”, e dignatario a duna di conoce.

            Premier Wever-Croes a informa cu aworaki, Gobierno tin hopi medida “in place”, y pa awor ta medidanan cu mester pa combati e desaroyo nobo aki, cu e variante Omicron.

            “Pa awo nos no ta mira cu nos mester bay escala of aumenta nos medidanan, pero nos ta keda alerta y evalua e situacion aki constantemente, y si mester cualkier cambio nos mester tuma decisionnan door di e cambionan aki”, Prome Minister a subraya.

            E situacion aki por bay lihe, of por bay poco poco, tur cos ta depende y pesey mi ta pidi tur hende pa keda pendiente di e cambionan cu por wordo anuncia”, e dignatario a remarca.

            El a agrega cu tambe gobierno ta pendiente, pa mira mas di cerca kico ta e efectonan di Omicron, pasobra den otro paisnan cu e ta activo, berdad por mira cu e ta hopi mas contagioso; sinembargo, e efectonan nos no ta asina convenci ainda, cu nan ta asina mas peligroso cu locual ta conoci.

            Prome Minister a subraya cu aworaki tur hende na Aruba mester recorda e disciplina, y ademas, Aruba ta bay drenta den e temporada halto di turismo, cu hopi hende depende di dje pa nan recuperacion economico, y gobierno kier haci tur posible pa evita cu lo por perde e temporada halto, aki na Aruba.