Variante nobo di Covid-19 ta plamando rapidamente na Merca

The content originally appeared on: Diario

Esaki ta su sintomanan mas comun

ATLANTA: E momentonan aki tur hende nan bista ta riba un variante nobo di e virus di Covid-19, esta esun yama ‘JN.1’ cu ta un cepa nobo hopi muta cu a bin ta plamando na Merca den ultimo simannan.  Mirando cu Merca ainda no a logra yega na e piek di temporada di virus respiratorio, lo por bay mira pronto mas caso di e variante nobo aki den siguiente simannan.

   JN.1 ta awor e variante cu ta creciendo mas na Merca, segun US Centers for Disease Control and Prevention (CDC) na Atlanta a divulga.  Aworaki e ta responsable pa mas di 1/5 di tur contagio na Merca.

   E subvariante HV.1 keto bay ta e cepa dominante aworaki, pero JN.1 no ta mucho leu su tras.  Den e periodo di dos siman, HV.1 tabata responsable pa como 30% di casonan di Covid-19 na Merca, segun calculonan di CDC.  JN.1 tabata e di dos cepa mas prevalente, esta cu e ta responsable pa 21% di casonan, sigui pa e cepa EG.5.

   Cientificonan ta vigilando JN.1 di cerca, pasobra el a trece algun preocupacion debi na su crecimento rapido y cantidad grandi di mutacion.  Sinembargo e variante nobo aki ta mas hopi similar cu un cepa cu a wordo mira caba antes.  E ta parce di ta casi igual cu esun yama BA.2.86 conoci como ‘Pirola’, cu tabata plamando na Merca desde verano.

   JN.1 tin un mutacion mas compara cu su cepa pariente BA.2.86, cu tin mas di 30 mutacion cu ta pone ta diferente cu e variante omicron XBB.1.5  Durante 2023, XBB.1.5 tabata e cepa dominante, y su variante a wordo inclui den e vacuna di mas nobo contra Covid-19.

   Tur e variantenan prevalente di Covid-19 aworaki na Merca ta descendiente di omicron, cu a cuminsa circula na final di 2021.

   Pero den ultimo simannan, JN.1 a sobresali mas cu e otro variantenan, incluyendo su cepa pariente BA.2.86 como tambe EG.5 (yama ‘Eris’), y XBB.1.16 (yama ‘Arcturus’).

   JN.1 su crecimento ta net awor cu hospitalisacion di Covid ta subiendo rapidamente, influenza ta sigui plama, y actividad di virus respiratorio ta hopi halto na algun ciudad.  CDC ta adverti cu pa fin di luna, salanan di emergencia y Hospitalnan por haya nan cu extra pashent, mescos cu loke a pasa na 2022, specialmente den parti zuid di Merca.

   Conoce mas di JN.1: E variante aki a wordo detecta prome biaha na September 2023, y a wordo detecta na 12 pais te ainda, incluyendo Merca.

   Aworaki no tin ningun indicacion cu ta mustra cu un contagio di JN.1 ta diferente cu e otro variantenan di Covid-19 den aspecto di severidad y sintoma di malesa.  Pero e sintoma di JN.1 ta parce di ta similar cu otro cepanan, incluyendo: Dolor di garganta, congestion di nanishi, nanishi ta core, tosamento, cansancio, dolor di cabes, dolor di musculo, keintura y calafrieu, y perde sentido di smaak of holor.

   Segun CDC, e tipo y severidad di sintomanan cu un persona ta experiencia, normalmente ta depende mas riba e salud actual di e persona y su nivel di inmunidad.