‘Upgrading’ den e procesonan financiero lo hisa e calidad mas ainda

The content originally appeared on: Diario

Parlamentario Ricky Hoek (MEP):

ORANJESTAD (AAN): Diamars, Comision di Economia den Parlamento a haya un presentacion di KPMG y Directie Financiën. E bishita tabata pa elabora riba e plan di implementacion di e renobacion di e procesonan financiero na Aruba.

            Riba esaki, Parlamentario di Fraccion di MEP, Ricky Hoek, a duna di conoce cu e representantenan di KPMG a duna un biaha mas palabranan di elogio na e profesionalnan cu ta traha na Directie Financiën pa e calidad di trabao cu nan ta duna. Hoek ta expresa cu e ta hopi contento pa scucha con e profesionalnan local ta trahando na un manera bon y di calidad. Sinembargo, loke KPMG ta desea ta pa mehora y agilisa e procesonan aki pa hisa e eficiencia y e calidad mas ainda.

            Segun Hoek, esaki ta algo hopi beneficioso pa pueblo. Por ehempel, ora ta trata di bay keur auto na DTI caminda tin cu pasa den henter un proceso, pero kier pa e proceso aki cana mas lihe y eficiente. E idea ta pa tin e sistemanan di tecnologia ta bon combina cu otro pa asina ora cu e persona bay keur su auto, e ta bay na DTI y na DTI mes por drenta den sistema y wak tur e informacion di Directie Financiën y di Departamento di Impuesto, por ehempel. “Esaki ta scapa e persona aki hopi tempo, placa (…) y banda di gobierno tambe esaki ta bay mas eficiente y atende hopi mas persona hopi mas facil y hopi mas lihe”, a remarca.

            Banda di e aspecto aki, KPMG a bisa cu  Directie Financiën mester bay tuma mas control riba loke ta e resultado final. Nan lo bin cu cuater tarea. Ta bay pone rolnan den e procesonan pa controla con esakinan ta cana. Ademas, tin e procesonan financiero. E Parlamentario a laga sa cu KPMG a nota den un evaluacion chikito cu tin hopi conocemento y tambe tin varios tipo di conocemento riba e parti di finansas na Aruba. Sinembargo, KPMG kier pone tur esaki central. KPMG tambe kier bin cu expertonan financiero riba cierto area den e diferente departamentonan di finansas caminda ta bay haya expertonan local eyden.

            Algo hopi interesante cu KPMG a trece dilanti ta cu den e proceso aki no mester busca hende nobo den e aparato gubernamental pasobra ya e personanan cu tey caba lo por haci e trabao aki. Simplemente nan lo mester haya un ‘upgrading’ como tambe training y cursonan. Cu esaki ya caba lo subi e eficiencia y e calidad di e procesonan, Hoek a expresa. El a menciona tambe cu KPMG mes ta dispuesto pa haci inversionnan den e tipo di proyecto aki. E proyecto aki lo cuminsa na 2024. A cuminsa cu algun evaluacion y acercamento caba. Ta spera cu pa mita di aña inicia implementa esakinan pa den 2025 tur proceso ta na ordo.

            A agrega cu e meta ta pa na 2026 henter e sistema automatisa aki ta cla, tur proceso canando eficiente caminda tur persona sa e tarea cu nan tin y cu na final Aruba por haya su raportnan financiero na ora. Ricky Hoek a indica cu esaki ta un proceso cu lo dura rond di dos aña y pa e periodo aki KPMG ta disponibel pa haci inversionnan. Gobierno tambe lo mester haci algun inversion chikito.

            El a destaca e hecho cu riba e parti financiero di Aruba, tur cos ta canando bon. “Nos ta haciendo un tremendo trabao. Nos ta hopi contento cu gobierno di Aruba ta pone su enfasis riba e parti aki”. Ora cu finansas ta na ordo y cana bon, por sa cu otro areanan den e sociedad tambe por cana bon. Asina por haci mas inversion y pone dedicacion na otro puntonan cu tambe mester di atencion.

            Finalmente, e Parlamentario a bisa cu esaki sigur ta desaroyonan positivo pa Aruba. Pronto lo por wak e proyecto aki keda realisa pa asina pueblo por beneficia di dje.