Un total di 9013 turista a yega Aruba den fin di siman

The content originally appeared on: Diario

Minister Dangui Oduber

ORANJESTAD (AAN):  Na fin di luna di januari 2022 minister Oduber a anuncia e ‘’exit strategy’’ pa con Aruba por sali for di e pandemia. Cu un vision y strategia hopi cla, a dirigi y traha riba recuperacion di nos turismo. E enfoke tabata pa yega y surpasa nivelnan di nos turismo di aña 2019 cual tabata e miho aña di turismo den Aruba su historia.

            Minister Oduber ta hopi satisfecho cu e resultado, danki na e bon cooperacion y comunicacion cu tur partnernan den turismo. Tur indicador ta demostra cu Aruba ta recuperando su turismo y te hasta surpasando nivelnan di aña 2019 cual sigur ta algo sumamente remarcabel. 

            Den luna di april 2022 Aruba a recupera 108% di nos turismo den comparacion cu april 2019. Den luna di mei 2022 e mesun tendencia di recuperacion a continua y nos a experiencia un recuperacion di 103% den comparacion cu mei 2019. E datonan ta ilustra claramente cu pa e lunanan di april 2022 y mei 2022 nos a yega y surpasa nivelnan di aña 2019. E recuperacion di nos turismo ta fuerte y Aruba ta wordo reconoci pa instancianan internacional manera IMF y CAFT pa e recuperacion fuerte aki. 

            E fin di siman aki, Aruba a ricibi un gran cantidad di turista cu ta un indicacion cu e trend cu tabata tin den luna di april 2022 y mei 2022 ta continua.  Nos ta riba bon caminda pa loke ta nos turismo. Aruba a ricibi ariba diasabra y diadomingo un total di 9013 turista, cual sigur ta crea e perspectiva cu nos mester di dje.

            Aerolineanan ta manteniendo nan capacidad di asiento cu a reserva pa Aruba tambe y esaki sigur ta demostra e confianza cu aerolineanan tin den nos producto Aruba. Banda di esaki ya caba a anuncia un gran cantidad di vuelonan nobo, manera Sarpa for di Colombia y tambe Air Canada for di Toronto. Dentro di poco nos lo anuncia noticianan historico pa Aruba den cuadro di diversificacion di nos turismo. 

            Mester sigui enfatisa cu e logro di Aruba su recuperacion ta di gradici na esfuerzo nan conhunto di Ministerio di Turismo y Salud Publico conhunto cu partnernan manera ATA, AAA, APA & AHATA.

Turismo ta keda e driver principa di nos economia.