Un pelea di dos hoben ta bira poz di lodo politico

The content originally appeared on: Diario

Nivel di politica na Aruba ta sigui cay den accion baho — *Abuso a wordo haci di Prome Ministro cu creacion di scandal — *Aparentemente no tin mas arma politico pa destrui Wever-Croes

ORANJESTAD (AAN) — Dos hoben a topa otro den un localidad di recreo. A surgi un problema, cu a urgi autoridad interveni.

Normalmente e caso aki lo no tabata tin ningun importancia si no tabata pa e hecho cu e dos hobennan ta yiunan di personanan meti den politica di Aruba.

E dos hobennan ta yiunan di politiconan opositor.

E aspecto politico a haci cu e incidente aki a haya mucho mas atencion den prensa local cu e cantidad di incidentenan basa riba confrontacion entre hobennan.

Autoridad ta haci su trabou manera por spera na un pais di ley y orden den cual investigacionnan ta wordo haci ora e tipo di incidentenan aki surgi na lugarnan publico.

Normalmente den e casonan aki, e mama di uno di e hobennan sigur lo no a wordo lastra den lodo manera tabata e caso cu e ciudadano Evelyn Wever-Croes cu hunto cu su famia a wordo presenta na publico na un forma di abuso.

Ora ayera nos a tuma nota di loke a pasa nos mester a yega na e conclusion cu aki politica ta hunga un papel grandi y cu oponentenan politico di Evelyn Wever-Croes no tabata tin otro arma y a uza uno di e formanan mas baho, pa trata na destrui su reputacion.

Lodo y mas lodo ta presente den publicacionnan di asuntonan, cu si hasta si nan ta berdad, no ta asunto di ningun hende.

Con por ta posibel cu un pelea di dos hoben ta haci cu a bay saca tur tipo di informacion tocante un famia?

Codigo di prensa ta permiti pa presenta loke a presenta di Evelyn Wever-Croes, lagando un banda si ta berdad of no?

Polis ta dicidi kico e ta haci den e caso di un investigacion y no por bay lastra henter un famia den lodo pasobra un pelea di dos hoben ta wordo investiga.

Nos no huzga kico a pasa e dia cu e pelea entre dos hoben a tuma lugar. Nos ta huzga solamente si ta normal cu un mama y su famia ta wordo lastra pasobra e ta Prome Ministro.

Cu razon siman pasa Prome Ministro Evelyn Wever-Croes a anuncia cu ta basta pa lastra su persona y su famia den lodo.

For di momento cu el a asumi su responsabilidad como Prome Ministro di Aruba, abuso a wordo haci di su persona y su famia.

Continuamente ta mishi cu su famia pa trata na destrui su reputacion como hende, cu ningun hende por pone na disputa ya cu e ta conoci como un dama cu merece respet como dama!

Un abuso a tuma lugar dor di personanan cu no solamente ta destrui Evelyn Wever-Croes pero ta basho lodo riba henter e sistema politico di Aruba, cu sin duda conoce hopi motibo di berguensa no di parti di Evelyn Wever-Croes pero di parti di tanto hende di otro partido cu a termina den prison.

Wega sushi mester termina.

Un pagina scur a wordo skirbi den un incidente cu a wordo uza pa ataca Evelyn Wever-Croes pa probecho politico, cu awor si a destrui tur limite cu por a wordo destrui!

E sistema politico di Aruba a wordo pusha den un abismo den e desaroyo cu Prome Ministro Wever-Croes mester a demanda na autoridad pa e por defende su nomber y reputacion! Abuso!