Un mayor tin derecho di nenga vacuna pa su yiu?

The content originally appeared on: Diario

E realidad di polio ta mucho mas serio cu hende ta realisa

*Peliger pa personal den cuido cu no a vacuna contra Polio

*Polio ta un dolor destructur cu hende ta carga bida largo 

ORANJESTAD (AAN) —Polio a bira un menasa creciente pa bida di hende na paisnan cu hopi tempo pasa a hiba un lucha pisa pa pone un fin na Polio pa medio di vacuna.

E palabra “polio” tabata inspira miedo panico den e tempo cu mi tabata mucha y mundo tabata en busca di un vacuna cu na 1952 Jonas Salk a entrega na mundo.

E miedo pa haya Polio tabata grandi sigur cerca mucha, aunke adultonan tambe tabata biba cu miedo.

E alivio di por a wordo vacuna tabata grandi y a pusha e dolor di Polio for di e lista di asuntonan mas importante di mi lista di preocupacionnan personal.

Hopi aña despues, tempo mi tabata ya un estudiante, Polio a bolbe presenta mi dilanti den persona di un amiga, cu a bira victima di Polio.

Su pia no a keda nunca normal y e no por a cana completamente normal tampoco. Pero loke tabata mas tristo tabata e hecho cu Polio a bira e enemigo mas grandi den su bida ya cu e resultado di Polio tabata cu e tabata tin problema pa acepta cu e no por a cana manera otro persona nunca mas.

E no tabata tin mester di yudansa pa e cana, pero ora e cana por a nota cu su pia tabata tin un problema, cu no tabata un problema pa ningun di su amigonan.

Poco poco nos a cuminsa realisa cu e pia tabata stroba henter su bida. E tabata un “Mucha cu a haya Polio”. El a keda manca no solamente na su pia pero pa hopi tempo e no por a realisa su propio capacidad.

Como su amigonan nos a demostre e su gran balor y su enorme talento pa e bira un tremendo profesional, loke finalmente el a bira tambe.

Pues Polio no ta un barera solamente pa e core hunto cu otro mucha, pero tambe pa hiba un bida feliz y normal.

E no tabata un caso unico. Mas bien e tabata uno di e hopi casonan di personanan cu a contagia cu Polio, cu a stroba nan di hari y disfruta di bida.

E tabata tambe uno di e ultimo casonan na su ciudad cu a wordo contagia y asina e preocupacion di Polio a parce di no tabata existi mas te na momento cu hende a wordo afecta atrobe.

Hende cu a nenga e vacuna of yiunan di mayornan cu tabata duna nan yiunan mal rato si nan bisa cu nan kier vacuna, a causa e regreso di vacuna na mundo.

Tin un grupo grandi di mucha, cu ta biba bou gara absoluto di nan mayornan, cu ta opina cu e mucha no mester wordo vacuna. Esaki ta haci cu e mucha no ta wordo vacuna.

Prome cu Covid-19 a drenta mundo ya e Organisacion Mundial di Salud a adverti pa e resultadonan di un grupo cu ta contra vacuna.

Tin persona cu pa nan religion ta nenga di permiti nan muchanan vacuna y asina ta condena nan na enfermedad horibel. Esaki ta deseo di Dios, Kende a entrega na dokternan e sabudiria pa desaroya remedi y vacuna?

Awe Polio pues ta menasa atrobe pero na un forma mas grave. Mundo Medico ta pidi hende pa vacuna.

Nan ta pidi biaheronan na paisnan caminda a registra polio, pa percura pa nan ta vacuna.

Personana cu ta traha den cuido y ta core e peligro pa wordo contagia, mester vacana.

E dolor grandi ta muchanan cu mayornan ta stroba di haya e defensa di nan salud manera a pasa tambe cu e vacuna contra Covid-19 cu a causa morto innecesario y a afecta tanto mucha.

Mester revisa ley pa haci husticia cu muchanan menor di edad. Mescos cu por persigui mayornan cu no ta actua como mayor y percura pa seguridad y bienestar di nan yiunan, mester persigui mayornan cu ta contra vacuna pa nan yiu.

Un persona, aunke cu e ta mayor di un mucha por condena e mucha pa biba manca resto di su bida?

Awe nos ta haci un yamada serio na tur mayor pa percura pa nan yiunan vacuna y por ta un mucha  normal entre tur mucha normal.