Un hende mester paga pa recicla awa sushi!

The content originally appeared on: Diario

Esun cu ta paga pa e solucion, mester dicidi con ta yega na placa


Aruba mester uni pa soluciona un asunto mara na su desaroyo
Turista mester por comprende cu mester recicla awa cu ta gasta 

ORANJESTAD (AAN) E Ley di Privatisacion di RWZI a bay Parlamento. Esaki ta e informacion cu DIARIO a ricibi ayera den informacionnan cu mester a splica e solucion pa un problema serio na Aruba.

Den e documento ricibi, tambe ta bini dilanti cu lo mester introduci un tipo di belasting cu lo wordo paga pa turista, pa asina tin fondo pa soluciona e problema.

E asunto aki a bira topico den cual diferente opinion ta bini dilanti, cu na un pais democratico sigur ta normal pasobra ta hunto ta dicidi.

Pero tin un regla den bida, cu ta splica cu ta esun cu ta paga, ta dicidi con e ta yega na e placa pa asina e por haci su gasto.

E idioma Hulandes conoce palabranan cu ta dicidi semper y cuando bini dilanti, con ta paga un debe cu mester wordo paga.

Esun cu ta paga, ta dicidi pasobra e mester pone e placa riba mesa pa asina e loke mester tuma lugar, bira realidad.

Placa ta un paharito cu semper tin un neishi. Kende ta pone e placa riba mesa?

Un pregunta, cu tambe tin un contesta. Esun cu mester di e servicio of articulo, mester paga pa e gastonan.

Pues awor e pregunta ta bolbe su origen. Pakico Aruba tabata tin necesidad di e waterzuiveringsinstallatie? Kico ta e gastonan cu crecemento economico a nifica pa Aruba cu mester percura pa un infrastructura pa asina, placa necesario, subi riba mesa.

Pa turismo por a bira e entrada mas importante di Aruba, tabata tin necesidad di un infrastructura, a cual Gobierno mester percura.

Mester a construi caretera, mester a percura pa servicionan cu ta cuminza na e momento cu e turista yega Aruba y por ehempel mester haci uzo di un haf of aeropuerto.

Ora atende cu e presupuesto di Aruba, ta topa cu e gastonan cu Aruba tin pa mantene su economia, cu ta produci placa pa e economia por funciona.

Sin placa, sin inversion, no tin economia. Un piscador mester di boto y turismo mester di caretera, mester di cantidad di servicio cu e pais mester brinda.

DIARIO ta bon conoci cu tur e gastonan cu e sector di turismo ta produci pa un pais.

Di hospital, bon caretera, trankilidad politico te e awor pues un instalacion pa purifica awa, ta importante pa tin turismo.

Awor pakico tin tanto awa pa purifica na Aruba? Pasobra e cantidad di hende cu ta crea e necesidad pa purifica awa cu ta wordo uza, a crece pasobra ora papia di Aruba no ta papia solamente di habitante, pero di tur turista cu tambe ta bini Aruba.

DIARIO ta hopi conoci cu turismo internacional.  Limpieza y facilidadnan higienico di un destinacion turistico, ta sumamente importante.

Na e momentonan aki, naturaleza ta hunga un papel sumamente importante pa mundo, cu mas y mas ta haya su mes ta recicla awa y tur loke hende ta uza.

E ta costa placa. Esaki tur turista ta realisa pasobra na nan pais tambe.

Con ta paga e gastonan? Ta solamente pa motibo di Gobierno, gastonan ta subi?

Infrastuctura, paga dor di Pueblo ta necesario pa turismo, un sector cu cual DIARIO ta mas cu conoci, mescos cu tur e gastonan cu e trece cune sigur den un mundo cu ta papia mas y mas di medio ambiente.

Central den e mundo moderno tin un palabra. “Recicla”. Zuiveren. No susha laman, no susha tera.

Awor con y kende ta cobra pa e gastonan pa recicla, pa “zuiver”loke mester pa turismo, cu ta e industria mas grandi di Aruba?