Un formula moderno pa necesidad cu por crea ladron!

The content originally appeared on: Diario

Exigencianan nobo ta surgi den un era di cambio mundial total

*E maneho social y di Husticia den man di un experto policial

*E plan social pa atende cu e crisis humano di actualidad material 

ORANJESTAD(AAN)—Na final di 2023, Ministro di Husticia y Asuntonan Social a presenta den Parlamento na un momento cu e atencion di Aruba a cuminsa dirigi su mes mas riba e final di aña.

DIARIO a dicidi pa pone e topico cu a wordo discuti un rato un banda, hunto cu otro temanan, cu mester sigui haya atencion di e comunidad Arubano cu mescos cu tur otro parti di mundo, ta pasa den temponan di cambio cu ta entrega exigencianan nobo na periodismo tambe.

Periodismo mester uni comunidad den e buskeda di solucionnan cu cambionan mundial a presenta pa comunidad.

“Oportunidad ta crea ladron”, ta un sabiduria internacional di tur tempo pero cu sigur den e era di cambio cu nos ta biba aden actualmente, ta aplicabel.

E era moderno sigur por wordo considera culminacion di loke a cuminsa produci despues di gueranan mundial na Siglo 20 y den cual e forma cu placa a lora, a produci un mundo material.

Bida a cambia hunto cu posibilidadnan nobo cu tabata presenta y e forma cu material por a cumpli cu deseonan, a crea necesidad pa e parti social di un convivencia, haya tur atencion.

Si mira atras, por contempla e comunidad di antes, den cual e asistencia di hende pa otro, tabata evita desastrenan social. E instituto familiar tabata tin raiznan fuerte entre otro.

Entrada di sigur television, a crea un mundo di demanda material desconoci pero tambe formanan cu por pone moral y balor humano un banda, pa conkista material.

Productonan di marca, cambio continuo di moda, a crea exigencianan pa e comunidad mundial moderno, na cual tur hende ta adapta nan mes pa por participa.

Sinembargo, no ta tur hende por participa debi na e situacionnan social, cu mundialmente ta trece retonan nobo.

Trahadornan den sector di Husticia continuamente ta wordo confronta cu problemanan cu a wordo crea den situacionnan social, cu demasiado bez ta keda scondi.

Un bon produccion pa maneho den temponan moderno tabata sigur e Plan Social, cu a bolbe haya tur atencion na momento cu Ministro Rocco Tjon a presenta den Parlamento y a duna informacion di e forma cu e cantidad di proyectonan ainda conoce ehecucion.

No ta Aruba so ta sinti e peso di cambio. Mas y mas copilacion di informacionnan riba tereno social y criminal, ta trece dilanti con miseria ta crea situacionnan desastroso.

Por ehempel, manera DIARIO ya a informa den pasado, informacionnan internacional ta indica con negoshi ta wordo haci cu armanan cu wordo uza den gueranan. Negoshinan increibel, cu ta duna prueba di e problemanan serio cu e sector di Husticia ta registra pero cu tin nan fundeshi den situacionnan social y cambionan di sigur e forma cu den seno familiar tabata tin mas control riba mucha y nan educacion, cu ta bira sumamente importante den loke ta norma y balor di un comunidad.

Na 2024, entrada di un epoca cu lo trece cambionan sumamente grandi, ta di gran importancia, pa politica en general pero sigur Parlamento, dedica mas atencion na loke ta base di e plan social y e contenido di e programanan cu ta wordo ehecuta. Na mes momento, Parlamento di Aruba, mester ocupa su mes mas y mas cu e amenazanan cu infiltracion di mentalidad materialista ta crea pa un comunidad.

Den esaki sigur mester papia di e grado di tension cu tanto familia mester atende cune debi na tanto cambio mundial y exigencianan moderno di comunidad, cu cual nan no por cumpli.

Tension ta causa di problemanan serio riba plataforma internacional, cu ta conduci na problema familiar y social, cu por desborda den criminalidad.

Aruba na e momentonan aki tin un Ministro di Husticia, cu mester atende tambe cu e ramo social. Su conocemento y experencia como experto riba tereno di Husticia, sigur mester wordo utiliza pa yega na demandanan mas importante di 2024 pa hende conoce felicidad.