Un Estado di Derecho mester tin un base solido

The content originally appeared on: Diario

Ley tin un solo interpretacion pa tur cu mester atende cune — *Glenbert Croes mester retira durante e proceso di investigacion legal — *Maneho legal di un situacion describi den ley ta na disputa directo

ORANJESTAD(AAN)- Na uno di e momentonan mas importante den historia di sobrevivencia di Aruba, otro bom ta rementa pa crea e oportunidad pa oposicion crea un piñata pa haya voto y pa un Ministro trata na hustifica pa su mes.

Ayera Ministerio Publico a anuncia cu a cuminsa cu un  “feitenonderzoek”, un investigacion di hechos pa decisionnan cu a wordo tuma dor di Minister Glenbert Croes.

Ministerio Publico no a lansa un sospecho contra Ministro Glenbert Croes, pero un investigacion ta wordo haci entorno un caso den cual e ta central.

Pa por bisa si Ministro Glenbert Croes a actua corectamente of no, Ministerio Publico mester investiga kico a pasa y a base di kico ta cuminsa cu un investigacion cu tampoco por wordo habri sin mas contra un persona.

For di momento cu Ministerio Publico a start un investigacion den un asunto den cual decision di Glenbert Croes ta importante, e mester a tuma su retiro y su partido y coalicion, mester a mira con ta atende cu e continuacion di gobernacion mientras e investigacion ta tuma su curso.

Cu un persona cu ta wordo investiga dor di autoridad no por keda den Gobierno of Parlamento, ta un posicion cu DIARIO a asumi a base di e pakete di normanan y balor, cu ta vigente pa Aruba.

E hecho cu Aruba tin un Miembro di Parlamento den persona di Benny Sevinger cu ta acusado di Husticia, no ta hustifica pa Aruba tin tambe un Minister kende ta parti di un investigacion, cu mester trece claridad.

Nos punto di partida ta, cu Aruba ta un Estado di Derecho, un Estado di Ley, cu ta duna autoridad na e tres alanan di gobernacion, pa dicidi con mester actua den cada cirsumstancia.

Nos punto di partida ta keda, cu mester defende e reputacion intachabel di Aruba como pais, cu for di momento cu el a acepta su Status Aparte a wordo confronta cu situacionnan cu a trata di pone e tremendo reputacion di e pais na duda.

E hecho cu Aruba a bira pais sin e economia cu Lago tabata sostene, tabata tin su efectonan.

Ainda por corda, cu e prome gobierno di Aruba a introduci supuesto inversionistanan pa Aruba, cu a mira con informacion di Interpol a pone Mafia na careda pasobra e supuesto inversionistanan tabata Mafia.

Hotelnan a cuminsa yena Aruba, cu awe no a resta caminda pa hende cana. Den esaki, nomber di Aruba casi a basha abou cu e proyecto Beta.

Investigacionnan serio manera di e Fondo Desaroyo Nobo San Nicolas nunca a termina mientras 1.6 Biyon di Aruba a wordo entrega dor di mayoria di Parlamento di Aruba na nan lider Prome Ministro Mike Eman pa e gasta manera e kier.

Kende a gosa di e fondo di 1.6 Biyon te awe no ta conoci. DIARIO semper a insisti pa e rapport aki wordo investiga dor di Ministerio Publico, cu ta e aparato di investigacion pa husticia wordo haci na Aruba.

Durante ultimo añanan, investigacion di figuranan politico ta afecta e imagen y bienestar di Aruba, cas di Arubianonan cu a gosa di reputacion internacional.

E forma pa mustra mundo cu Aruba ta keda un Estado di Derecho ta, pa sostene e base di principionan.

Den casonan di investigacion den cual nomber di politiconan ta wordo menciona, DIARIO a para firme cu un politico mester retira na momento cu e ta parti di un investigacion, manera ta e caso actualmente cu Glenbert Croes, kende a splica publicamente cu e no a comete un acto contra ley.

Sinembargo, ta keda na autoridad pa retira e investigacion a base di e declaracion di Glenbert Croes, cu segun nos principio mester hala atras a base di e principio cu un politico cu un posicion activo den Gobierno of Parlamento, no por ta na disputa.

Si resulta cu e investigacion no tabata tin motibo, e ta bolbe den su funcion.

Siglo 21 a trece hopi turbulencia pa Aruba como Estado di Derecho. Mantencion di Estado di Derecho, ta e instrumento mas importante pa fortalece futuro di e pais.

Ta keda pa nos un pregunta cardinal. Pakico un “feitenonderzoek”, un investigacion di hechos, mara na un ley cu ta papia idioma cla?