Turista a perde vuelo di Spirit y su cabes a flip

The content originally appeared on: Diario

Drama na aeropuerto — ORANJESTAD (AAN):  Diasabra den oranan di atardi a sosode un incidente na aeropuerto ora cu un pareha mericano no a presenta na ora na e gate pa aborda nan vuelo pa bay Merca bek.


E pareha, a yega airport na tempo, segun informacion, pero pa un of otro motibo nan no a presenta na gate pa aborda e vuelo di Spirit. A yama nan varios biaha pa medio di e sistema di comunicacion publico di airport pero nan no a atende e yamada.

Ora cu nan a yega na e sala pa aborda, e porta di e avion ya caba tabata cera. Ta conoci cu segun reglanan internacional, asina cu e porta di e avion cera no por habri’e bek.

Esaki a nifica cu e pareha no por a aborda e avion mas. Mesora, e muher a perde cabes y a cuminsa reclama e personal di e aerolinea.

Door cu e no por a controla su mes mas mester a pidi yudansa di polis. Nan a hibe na e sala di ‘arrivals’ bek door di su comportacion, pero eynan mes el a bira mas violento y a cuminsa bringa cu e agentenan. Tambe tabata tin tiramento di man cu a cay y haci daño na un di e agentenan femenino.

Te na dado momento te hasta por a mira algun rasca na e nek di e turista femenino cu a comporta masha violento.

Segun informacion, e muher turista no tabata mustra di ta bao di influencia di alcohol, pero si e lo a bay den un atake di ansiedad. El a laga sa cu e mester a aborda e vuelo pasobra diadomingo e mester a atende un babyshower y cu si e no tabata yega Merca na tempo e lo wordo kita di trabao.

Door di tur locual a sosode, e muher mericano a haya su mes confronta cu el a wordo transporta pa warda di polis pa asina subfiscal por a atende cu e caso.