Turbulencia politico Hulanda origen crisis financiero Aruba ?

The content originally appeared on: Diario

COHO mester a nace na 2009 ora garantia bon gobernacion a muri — *Intervencion Hulandes actual ta duna prueba di fayo Reino na 2009?

ORANJESTAD(AAN)—Dia 23 di November 2009, Raad van Advies di Aruba a ricibi un carta di e gobierno nobo di Aruba,  cu a drenta historia como Gabinete Mike Eman 1.

Den e carta, Raad van Advies di Aruba a wordo pidi, pa “zo spoedig mogelijk” (tan pronto cu ta posibel), prome cu 29 di November 2009, conseha Gobierno Mike Eman riba e posibilidad pa baha BBO cu mitar.

Raad van Advies a mustra riba su deber constitucional y a haci su trabou. Dia 9 di December 2009, el a contesta Gobierno Mike Eman den un carta, cu realmente mester a bira inicio di accion di Gobierno di Reino, cu tabata tin e deber pa interveni y evita cu e siguridad financiero di Aruba a wordo destrui y cu e base di Reino di bon gobernacion, lo a pasa pa historia.

Awe cu Aruba mester bolbe na mesa cu Hulanda, DIARIO a indaga den e realidad finaniero di Aruba pa entrega e prueba cu Reino no por deshaci di e hecho cu na 2009 Reino mester a interveni y a base di e carta cu a bay pa Raad van Advies, evita pa Aruba a cay den un desastre financiero cu awor mester wordo soluciona cu COHO!

Pakico Reino Hulandes a tarda tanto tempo pa actua contra destruccion di e bienestar financiero di Aruba, cu ta bay contra e alma di Statuut, manera awe exigencianan di Hulanda pa COHO ta demostra?

Segun  esencia di Statuut, Reino tabata tin e deber di cuminsa atende cu Gobierno Mike Eman y splica Gobierno Mike Eman na 2009, cu e no por realisa su promesa di campaña y no por deshaci di mitar BBO ya cu esaki lo causa destruccion financiero di Aruba.

E conseho di Raad van Advies cu Mike Eman a pone un banda pa cumpli cu su campaña, mester a pone Reino Hulandes actua hunto cu vigilancia propio cu Statuut ta exigi di Reino, cu a actua na 2014 pero demasiado laat.

Ora porfin Ministro Plasterk a baha Mike Eman for di Fort Zoutman y a mara man di su gobernacion cu aanwijzing, Hulanda ya a bandona un temporada serio di turbulencia politico, cu cambio continuo di Gobierno.

Entre 2002 y 2010, cuatro Gobierno Balkende a wordo registra den historia di Hulanda, sigui pa yegada di Rutte na 2010, cu no a bira fin di problemanan politico na Hulanda.

Tabata na November 2012 cu e segundo Gabinete Rutte lo a sinta pa keda na poder te na 2017.

Pues hustamente den e tempo cu Reino Hulandes mester a vigila bon gobernacion di Aruba, Hulanda mes tabata nabega den lama politico bruto y por mira con na 2014 ora ya baca a hoga na poz, Plasterk a yega Aruba hopi laat pa evita loke a pasa cu Aruba.

Awe Hulanda mester tuma e realidad aki na cuenta ora ta papia di COHO y medidanan pisa cu kier impone riba Aruba.

Na 2010 Hulanda tabata tin e deber pa interveni ora Gobierno Mike Eman a trapa riba Ley di Contabilidad, cu ta regla kico bon gobernacion cu Statuut ta encera y gasta garantisa, ta exigi.

Cifranan ta mustra con na 2009 Aruba tabata tin un fayo di 97 Miyon riba su presupuesto den un tempo, cu mundo tabata den e recesion cu te awe ni e problemanan di Ukraine no a iguala.

Un situacion serio pa e realidad financiero di Aruba, cu a mira con e 97 Miyon aki si el a keda existi na 2010, lo por a subi cu 76 Miyon solamente di e falta di e placa di BBO cu a wordo baha.

Investigacionnan di DIARIO ta duna prueba, cu si Reino a interveni na 2009 y  exigi Gobierno Mike Eman deshaci di sea e mitar BBO of tur e reduccionnan fiscal cu a wordo introduci pa baha otro belastingnan na 2009, Aruba lo no ta den e desastre financiero actual.

Na final medidanan cu Hulanda kier impone riba Aruba ta costa mucho mas, cu e wega politico di deshaci di BBO, cu Gobierno Mike Eman mes a admiti cu a fracasa, loke a haci cu te awe Aruba ta paga e otro mitar di BBO hunto cu loke mester a reemplasa e BBO cu a wordo kita.

Expertonan cu DIARIO a consulta den su investigacionnan a indica cu exigencianan di bon gobernacion a muri na 2009 y cu Hulanda den su turbulencia politico, no a actua contra e reduccion di BBO sin alternativa y preparacion debido, manera tur documento oficial ta proba.