Tur e sospechosonan di atraco arma riba taxista ta sigui deteni pendiente di caso penal den Corte

admin

Aunke cu tin dos hoben menor di edad den e grupo

atracadornan_taxista_01
atracadornan_taxista_02
atracadornan_taxista_03

ORANJESTAD (AAN): Tur e 7 sospechosonan di e lamentable atraco arma riba e taxista R.G. ta encarcela pendiente e caso penal. Investigacion cu DIARIO a haci ta mustra cu entre e sospechosonan tin un hoben di 17 y un otro di 16 aña.

Aunke cu segun ley penal, nan ta menor di edad, esey no ta kita afor cu nan por keda encarcela te dia di e caso. E unico diferencia cu lo tin pa e dos sospechosonan menor di edad, compara cu e resto di e grupo ta cu Fiscal lo bay aplica e ley di hubentud pa nan cu ta encera cu e castigo lo ta menos.

HOPI PREOCUPACION: Dia 26 di Juli 2015, e taxista R.G. a worde atraca y tira. E lamentable incidente aki a sacudi henter comunidad. Mas ainda tur e taxistanan, cu awor ta sinti nan mes amenaza di por worde atraca.

Den pasado tabatin un caso caminda un taxista femenino a worde atraca pa un homber cu cuchiu y e consecuencia di esaki tabata cu e taxista a keda den un trauma y no a core taxi mas.

Tabatin mas taxista cu a yega di bira victima di atraco tambe pero nan si a sigui core. Loke a causa hopi preocupacion cerca e taxistanan, ta e lamentable incidente di dia 26 di Juli 2015, caminda a tira e taxista den cara. Hopi a kere cu e taxista a perde su bista pero danki Dios esey no ta e caso.

Sinembargo e ta keda un caso hopi serio y ta di aplaudi cu Polis a logra detene e grupo di 7 cu awor lo worde persigui pa Ministerio Publico.

CASO LO TA OTRO LUNA: Investigacion cu DIARIO a haci ta mustra cu otro luna, esta December 2015, tur e 7 sospechosonan lo presenta den Corte. No ta sigur cu e caso lo bay tuma lugar pero en todo caso nan lo mester presenta dilanti Hues, manera ley ta stipula.

Posiblemente e caso lo ta pro forma, caminda Fiscal lo informa Hues y abogadonan di un ke otro pakico e tratamento no por tuma lugar. Por bien ta cu ainda e investigacion no ta completo cera of cu ainda e procesverbaal oficial no ta cla.

Manera DIARIO a publica, Ministerio Publico lo bay baha cu tur peso di ley riba e sospechosonan cu ta worde haya culpable pasobra no por tolera cu nos taxistanan cu ta e cara di Aruba pa cu e turistanan, ta worde atraca.

Tampoco no por tolera cu atraco arma ta tuma lugar riba nos isla cu ta conoci como un lugar trankilo y cu hendenan hopi cordial. Ta e tipo di incidentenan aki ta pone nos turismo den peliger.

 

Next Post

Detencion a cay pa complicenan den atraco riba Casino

ORANJESTAD   (AAN):   Despues cu autoridadnan a haci detencion di e tres sospechoso envolvi den e atraco riba Excelsior casino unda interogacion a tuma lugar, nombernan a cuminsa cay cerca autoridad. Di biaha a start un investigacion grandi pa busca un of mas sospechoso como complice envolvi den e atraco grandi […]