Truck blinda y ciclista envolvi den accident fatal na Ponton

The content originally appeared on: Diario

E di tres morto den trafico

ORANJESTAD (AAN): E condicion atmosferico riba Diahuebs segun e pronostico tabata mustra cu chens pa awacero ta aumenta riba Aruba.  Y net un poco despues di 11’or, diferente area di Aruba a cuminza haya awacero.  Caminda a bira muha, y trafico a cuminza move mas slow.

   Diripiente pa 11:40 am, yamada a drenta na Polis pa informa cu un accident a caba di socede na e rotonde nobo di Ponton cu Watty Vos Boulevard.

   E prome funcionario di Polis cu a yega eynan prome cu e patruya mes, a ripara cu ta un Truck a dal un ciclista, y el a nota cu e victima ta hopi grave, y no ta duna señal vital mas.  Toch el a solicita pa presencia mas urgente di Ambulans, y tambe a pidi pa manda autoridadnan competente na e lugar, incluyendo Specialista di Trafico y personal forensico di BFTO.

   Diferente unidad di Polis a yega pa asina cuminza desvia trafico, specialmente vehiculonan cu ta bin di Ponton direccion Playa.

   E accident ta net na e circulo paden di e rotonde, y ta parce cu e Truck a caba di sali for di e caminda procedente di Tanki Flip.

   Dos unidad di Ambulans a yega basta rapido na e lugar, y cu rapidez e Paramediconan a baha pa check e victima, pero mesora a ripara cu e nota dunando ningun señal di ta na bida.  Aki ta unda cu mesora nan a pidi pa Centro di Alarma manda busca un Docter pa yega na e lugar.  Como cu tin hopi trafico di hende eybanda, nan a pone un clechi blauw riba su curpa.

   Testigonan a indica na Polis, cu tanto e bicicleta como tambe e Truck tabata bin di panort, esta for di e caminda di Tanki Flip.

   E bicicleta mes ta uno cu ta conoci na Aruba como “bicicleta pa muher”, como cu e structura di frame di e bais ta diferente.  Esun aki cu tin diferente harnas pa pone tas of caha, ta wordo describi tambe tin biaha como un “bicicleta pa haci respondi”.

   Security Video Camera di un cas na Ponton a graba e accident aki, y durante oranan di atardi esaki a bira viral riba Social Media rond di e isla.  E ta mustra cu e ciclista tabata core riba e asfalt (y no riba e fietspad) di e caminda di Tanki Flip pa Rotonde.  El a pasa varios auto, pa asina e yega na e Rotonde.  Net e momento ey tambe tin un Truck ta dunando preferencia na trafico cu ta draai riba e rotonde.

   Ta trata di e Truck TR-141 cu ta un vehiculo blinda cu ta pertenece na DOMESA, y cu ta construi riba un chassis di Ford F350 Super Duty Dual Rear Wheel, cu ta basta pisa.

   Specialista di Trafico lo tin di bay revisa e Security Video aki, pasobra bo ta mira cu tanto e Truck di DOMESA y e ciclista a subi e rotonde hunto.  Ta bisti cu tur dos kier tuma e circulo mas mey-mey di e rotonde.

   E chauffeur di e Truck kizas no sa mes cu e tin un ciclista coriendo banda di dje, y riba e video bo ta mira cu e Truck no a tuma e birada pa subi e circulo interior mas “hancho”.  Pues bo ta mire cu e ta pasando hopi cerca di e cement mey-mey di e rotonde cu DOW ta yama ‘lomba di cacho’.  Y net ora e ta yegando aki, ta parce cu esaki a sorprende e ciclista y el a hasta wanta na e Truck pasobra e bicicleta tambe ta bayendo pa dal den e ‘lomba di cacho’.

   Aki ta unda e ciclista a pega cerca di e truck, a sali cay for di e bicicleta, y aki ta unda su cabez a bay cay net bao di e double-rear wheel.  E video ta mustra cu e wielnan diki aki parti patras di e Truck a pasa riba dje.

   Sinembargo ta Specialista di Trafico tin ultimo palabra den henter e investigacion, y pesey a laga confisca e Truck tambe pa mas investigacion.  Como cu na e wantalodo banda dilanti tambe tin un deuk, cu tin di investiga.

  Mientras tanto famianan di e victima a yega eynan, y pesey a pidi presencia di Bureau Slachtofferhulp bin duna un man.

   Pa 12:25 pm, Dr. Texier a constata morto di e ciclista Franklyn E. Dirks, naci dia 25 di Juli 1958, pues tin 63 aña di edad.

   Finalmente cu shersh di Aurora Funeral Home, e restonan mortal di e ciclista a wordo transporta for di e lugar di accident.

   Vocero Policial suplente, Lilian Rasmijn a indica na DIARIO, cu esaki a bira e di 3 morto den trafico pa 2022, y tur di nan a socede den luna di April.  E prome tambe tabata riba Watty Vos Boulevard, e di dos na Solito, y awor esaki cu relativamente ta hopi cerca tambe.

   Na famianan di e fayecido, tanto DIARIO como Cuerpo Policial ta manda su mas profundo palabra di condolencia.