Trio musical 297 STRINGS a haci nan debut

The content originally appeared on: Diario

ORANJESTAD (AAN): Despues di dos produccion cu e grupo aki a lanza, a ricibi diferente bon comentario riba e musica y e concepto cu nan a presenta e produccion aki bou di e nomber 297 STRINGS.


Esaki ta suficiente motibo pa cuminsa practica y prepara nan mes pa por sali y deleita e pueblo di Aruba y tambe su bishitantenan cu un musica hopi varia den nos mundo cultural pero alavez un musica diferente.

Den nan reciente produccion a recauda fondo 100% pa instancianan of organisacionnan cu ta yuda den comunidad.

Un bon musica y un bon concepto, sigur algo cu nos isla falta ta locual e trio aki ta bin presenta y ofrece, cual ta un musica di fondo “background music” tocando solamente cu cuerda manera e cuarta, baho y mandolin, sin ta uza instrumentonan ritmico of otro ritmonan digitalisa. Nan ta toca en bibo cu un variacion di musica bieu y nobo, y diferente clasico internacional pero tambe nos musica popular crioyo.

E trio aki ta consisti di Ivan Croes riba cuarta, Andy Martes cu e baho y Rubin Ponson tocando e mandolin cu ta presenta un musica instrumental y hopi relahante, un concepto cu ta traha specialmente di musica suave pa nos hendenan local y tambe turistanan cu hopi biaha ta pidi pa e musica cultural y sigur den e formato aki.

Den proximo dianan por mira e videoclip di e trio aki riba YouTube y scucha nan musica.

E debut di e trio aki a tuma lugar diasabra 13 di november na “The Old Cunucu House”.