Trinidad & Tobago lo habri frontera na Juli solamente pa pasaheronan cu vacuna

The content originally appeared on: Diario

PORT OF SPAIN: E mensahe ta cla y raspa!  Prome Ministro Keith Rowley a bisa cu stranheronan cu no ta vacuna contra Covid-19, djis simplemente lo no por drenta e pais. 


Esey ta e mensahe cu gobierno di Trinidad & Tobago a duna Diadomingo y bisa cu nan fronteranan lo habri bek dia 17 di Juli 2021.  Pero a adverti mesora cu stranheronan sin vacuna, lo no por drenta.

   Prome Ministro Keith Rowley a indica cu Aeropuerto Internacional di e pais lo habri bek pa vuelonan internacional, pero a keda ripiti cu stranheronan cu nunca a wordo vacuna, lo no por drenta den e pais Caribense.

   Pero toch el a bisa cu esnan cu yega Trinidad & Tobago sin cu nan ta vacuna, lo por haya chens di bay den cuarentena supervisa pa Gobierno, pa 14 dia largo.  Nan a pone algun Hotel aproba unda bo ta bay pasa cuarentena, pero keda cera den camber sin cu por sali.

   El a bisa cu muchanan cu no ta vacuna, lo por drenta e pais si acaso nan ta acompaña pa nan mayornan cu si ta vacuna.

   Segun Rowley, tin plan tambe hunto cu otro paisnan di Comunidad Caribense (Caricom), pa bin cu un sistema di paspoort digital unda esnan cu a haya vacuna por yena nan dato riba un app, cu ta check si enberdad e ta vacuna of no.  El a bisa cu ya caba e sistema aki a wordo implementa na algun pais den Caribe, y pesey nan lo usa e mesun sistema y den dos siman nan ta pensa cu e lo ta cla pa nan tambe ricibi stranheronan vacuna.

   E tin mal noticia sinembargo, esta cu Gobierno na Trinidad & Tobago keto bay lo no duna OK ainda pa trabaonan den construccion start bek, aunke nan programa di vacunacion na e isla a bay bon pa e trahadornan di e sector ey.