Tres proyecto importante rond di salud mental ta cuminza e luna aki

The content originally appeared on: Diario

Minister Rocco Tjon:

ORANJESTAD (AAN): Diamars mainta Minister di Husticia y Asuntonan Social Rocco Tjon a tene un conferencia di prensa, durante di cual el a cuminza na papia riba salud mental.

Esaki mirando cu nos ta den e ‘Mental Awareness Month’.

E mandatario a indica cu ehecucion di 3 proyecto importante lo cuminza e luna aki.

“Manera ta conoci for di inicio nos a lanta un ‘stuurgroep’ GGZ, caminda tur e stakeholders incluyendo e huisartsenvereniging ta forma parti di dje”.

December ultimo nan a firma tambe un MoU, mientras cu diferente otro protocol a wordo firma tambe entre e institutonan cu ta brinda  cuido specializa pa loke ta e parti di salud mental den Reino, segun Tjon.

El a sigui bisa cu a base di esaki diferente punto di accion a wordo defini.

Un punto hopi importante ta cu Stichting Huntu ta bay bira un realidad e luna aki.

“Ya caba e tereno caminda e fundacion aki lo wordo construi a wordo haci limpi, mientras cu e groundbreaking ta bay tuma lugar e luna aki”.

Stichting Huntu ta FMAA, caminda cu nan ta bay amplia e trabaonan cu nan ta eherce, unda cu tambe SPD ta bay cay bao di esaki, segun e mandatario, kende a indica cu e fundacion aki lo no enfoca solamente riba e parti di adiccion, sino tambe riba e parti di salud mental.

Specificamente nan lo bay tin un departamento cu lo bay enfoca riba nos mucha y hobennan.

“Mi ta kere cu esaki ta un proyecto sumamente importante cu lo bay wordo realiza”.

Banda di esey tambe e trabaonan pa e inicio di e grupo cu ta bay atende cu e lista di espera ta finalizando aworaki hunto cu AZV y 1 di Juni e werkgroep aki ta bay inicia nan trabaonan y di e forma aki lo bay atende cu e problematica di lista di espera.

Esaki ta algo cu a wordo treci pa dilanti pa diferente fundacion, segun e minister.

Tjon a sigui bisa cu e lunanan cu a pasa a trece diferente stakeholders hunto pa por yega na un definicion concreto di con grandi e lista di espera aki ta.

“Danki na aprobacion di presupuesto 2022 nos por a aloca fondonan pa percura cu profesionalnan lo wordo emplea specificamente pa atende cu e parti aki so”, segun e mandatario.

El a sigui bisa cu pa loke ta e plan a largo plazo, a presenta e un plan di multiple aña pa atende cu salud mental.

“PAHO tambe a yuda nos pa yega na un plan te cu 2030, con pa atende na e mihor forma cu e parti di salud mental y adiccion y pa e motibo ey e luna aki nos lo instala tres grupo di trabao cu ta bay atende cu e diferente tematicanan aki”.

Esaki segun Tjon, kende a indica cu 1 grupo di trabao ta bay atende specificamente cu e parti di ‘service delivery’, cu ta inclui adaptacion di leynan.

El a sigui bisa cu e ‘werkgroep’ aki lo bay atende tambe specificamente cu e maneho pa loke ta e ‘doorverwijzen’ y e problematica di opvang.

E di dos werkgroep cu ta e parti di Health Workforce y Health Information, lo atende specificamente cu e parti di opleiding y training.

Esaki ta inclui e parti di atende cu adictonan ambulante y e parti di prevencion y promocion.

E mandatario a indica cu den e parti di prevencion y promocion ta bay cay bao di FADA.

“FADA na un manera proactivo ta bayendo scolnan caba pa no solamente brinda informacion riba e parti di adiccion, sino tambe riba e parti di salud mental”, segun Tjon.

El a splica cu e di tres grupo di trabao lo atende cu tecnologianan medico y financiamento di salud.

Esaki ta inclui e asina yama ‘digitaal medisch client systeem’ y compra di medicamento pa loke ta e parti di salud mental, mientras cu lo evalua henter e manera di financia, pa loke ta e parti di GGZ y cuido di adiccion.