Transportacion aereo ta esencial pa industria di turismo

The content originally appeared on: Diario

Asociacion di Transportacion Internacional ta mira cambio positivo — *E era di Jet a entrega mundo e trampolin pa exito turistico *Segun IATA aviacion ta subi caminda di recuperacion na 2023

ORANJESTAD(AAN)- Ora papia di loke por spera di turismo, dos aspecto ta sumamente importante. E mercadonan mas importantenan por produci turista cu por paga e gastonan necesario y kico ta espectativanan di e transportacion pa e turista por yega Aruba?

Dos factor a hunga un papel importante den desaroyo di turismo como fuente economico na Siglo 20.

E epoca di oro despues di guera, a produci placa suficiente pa hende por a bandona su cas y ambiente pa un tempo y sinti su mes rey den e industria di hospitalidad.

Ta despues di Segundo Guera Mundial tambe hende a cuminsa disfruta di aviacion. Entrada pa e epoca di jet, a habri e portanan grandi di turismo cu awe ta wordo considera como e sector economico cu ta brinda mas diversificacion economico y oportunidad pa trabou.

Turismo ta tambe uno di e ramonan delicado di economia ya cu e ta depende completamente di hende cu ta e turista cu ta produci entrada y e trahadornan na tur nivel y den tur sector cu mester duna servicio na e turista.

E pandemia di Covid-19 y e Guera di Ukraine cu a resulta den aumento di prijs di petroleo ta afecta turismo y ta hiba mundo na un recesion, cu ta pone turismo tambe na peligro.

DIARIO a pone enfasis riba medidanan cu Merca ta tuma y ta afecta e poder financiero di e turista cu ta bini di Merca. Nan lo tin placa pa biaha?

Segun informacion e medidanan cu Merca a tuma den su intento pa stop e spiral di aumento di prijsnan, cu ta pues inflacion, mester wordo midi enfrente e prioridadnan di e turista.

Hende ta ansioso pa bandona su realidad di tur dia y biahe pa otro pais sigur ta un solucion. Den e situacion mundial actual di tanto tension, e turista lo prefera di scrap otro gasto pa asina e por bay cu vacacion y relaha.

Destinacionnan turistico ta haci tur loke nan por pa atrae turista, pero tin problemanan ta surgi den sector turistico manera den mundo di aviacion cu ta enfrenta problema cu entre otro personal.

Sin aviacion, no tin turismo fuera di turismo di crucero pa Aruba. Islanan mester di transportacion maritimo of cu avion mientras na paisnan grandi tin bus, trein y auto.

Aviacion ta sumamente importante pues na 2022 y kico ta opinion di e sector aki?

Willie Walsch, ta Director General di e Asociacion Internacional di Transportacion Aereo.

E ta optimista pa futuro di turismo y a mustra cu companianan di aviacion, segun ta mustra na e momentonan aki, lo tin menos perdida.

Na 2021 e perdida tabata 11.6 Biyon pero tur cos ta indica cu na 2022 e ta baha pa alcansa 9.7 Biyon. Hasta e ta papia di un posibel ganashi pa 2023, aunke mester tene cuenta cu loke petroleo por haci ainda.

Walsch ta optimista den un mundo sumamente dificil. E ta presenta su motibonan pa ta optimista tambe.

E ta mustra cu ya e cantidad di pasaheronan cu ta registra ta representa 83 porciento di pasaheronan prome cu Covid-19.

E problemanan cu companianan di aviacion tin actualmente ta basa riba scarcedad di personal y e hecho cu personal kier aumento di salario.

Na su parecer por soluciona e problemanan aki loke lo haci posibel pa for di 2023 mundo conoce un recuperacion pa alcansa normalidad.

Tin factornan cu e ta tene na bista manera e Guera di Ukraine y e pandemia cu no a desaparece totalmente.

Pero e ta mantene su optimismo cu ta basa riba un realidad. Hende a cansa di tanto problema y hende kier bolbe na normalidad.

E Asociacion di Companianan di Aviacion pues ta optimista. En todo caso nan tabata optimista un dia prome cu Banco Central di Merca a bolbe tuma medida cu tin efecto financiero pa turista tambe, cu awor conoce aumento di tarifanan di interes cu ta mishi cu credit card, hypotheek y debenan cu nan tin.

Tin un punto cu sigur ta conta pa Merca. E ta produci cuminda y energia. Merca ta  productor number dos di petroleo na mundo, pero e consumo di petroleo ta enorme.

DIARIO ta sigui traha pa por ofrece Aruba tur informacion riba e situacion sumamente interesante cu mundo ta confronta.