Tin plannan cla den caso di escalacion cu estadia ilegal di Venezolanonan

admin

Tin plannan cla den caso di escalacion cu estadia ilegal di Venezolanonan5
Tin plannan cla den caso di escalacion cu estadia ilegal di Venezolanonan1
Tin plannan cla den caso di escalacion cu estadia ilegal di Venezolanonan2
Tin plannan cla den caso di escalacion cu estadia ilegal di Venezolanonan3
Tin plannan cla den caso di escalacion cu estadia ilegal di Venezolanonan4

ORANJESTAD (AAN): Ex Inspector di Polis y actual director di KIA, Rocco Tjon tabata entre e oradornan cu a haci un presentacion recientemente na gremionan comercial encuanto di un cantidad di topico relevante y importante manera cifranan di criminalidad na Aruba, estadisticonan di solucion di crimen, accionnan di prevencion y maneho di Cuerpo Policial. “Pueblo sigur por sinti su mes sigur,” Tjon a expresa, agregando cu Cuerpo Policial ta un organizacion profesional cu mas y mas ta analisando tur cos miho pa combati tur crimen mas lihe y na un forma mas eficiente.

   A splica esunnan presente di iniciativanan y formanan cu ta manehando trendnan nobo y situacionnan existente y a haci un apelacion riba tur e organizacionnan pa sigui yuda Cuerpo Policial. Comunidad sigur ta aportando hopi na combati criminalidad, y esey ta un colaboracion cu Cuerpo Policial ta hopi contento cun’e y kier sin ningun duda mantene.

   Community policing tabata un di e elementonan discuti, segun Tjon ta splica, y tin diferente chatgroup cu a worde forma pa fomenta e sistema aki. Lo tin mas inversion den community policing tambe, el a agrega.

   Prevencion tambe ta un elemento clave ora cu ta papia di crimen y criminalidad, y Cuerpo Policial, y e cadena di husticia en general ta inverti hopi den prevencion.

   E parti represivo tambe a worde discuti durante di e presentacion, pues kico ta pasa y kico ta worde haci ora cu un crimen ya a keda cometi. A presenta cifranan di aresto y solucion di casonan, y por a wak tambe cu tabatin resultadonan satisfactorio, cu un reduccion den kiebro y ladronicia den cas, y kiebro di auto y hortamento di auto.

   Prevencion ta keda hopi importante y ademas di comunicacion cu comunidad pa medio di prensa y otro canalnan, e departamento di informacion, comunicacion y prevencion ta masha activo. E departamento di polis aki ta acepta invitacionnan pa presentacionnan na diferente grupo. Y, di otro banda nan ta traha na un forma pro activo tambe, ofreciendo presentacionnan na organizacionnan y gruponan di interes pa comparti cu nan informacion di con pa preveni di bira victima di criminalidad, problematica di gang y uzo di droga, entre otro.

   Un topico cu pa algun tempo comunidad ta hopi interesa den dje ta a migracion di Venezolanonan pa Aruba, mirando e situacion precario cu nan pais ta aden. Rocco Tjon a splica cu a discuti esaki tambe cu e gremionan, unda cu a mustra nan cu for di basta tempo caba Cuerpo Policial a prepara pa un eventual “massamigratie”.

   El a comenta cu tin un taskforce cu diferente partner di sector priva y sector publico cu ta monitor constantemente cuanto Venezolano ta bishita Aruba, y cuanto ta keda, entre otro. E plannan ta cla y si mira cu esaki ta keda aumenta y ta cuminsa mustra manera un migracion grandi, lo e plannan aki bay na vigor.

  Rocco Tjon a conclui bisando cu e plannan y accionnan no lo bira un asunto di Ministerio di Husticia so, pero ta inclui colaboracion y accion di tur Ministerio hunto; cada uno tin su rol pa hunga den e proceso aki.

Next Post

Den 3 aña SVb a paga 9 miyon na daño pa accidentenan di trabao

Minister di Labor na seminario di siguridad ORANJESTAD (AAN) – Minister di Labor Paul Croes tabatin e honor di realisa apertura di e seminario di siguridad organiza door di ACE Firm Engineering cual a tuma luga na Renaissance Convention Center.    “Ta trata di un organizacion cu ta traha riba […]