Tin nada di metemento di politica aworaki den asunto di Kinderhuis Imeldahof

The content originally appeared on: Diario

Minister Rocco Tjon a haya necesario pa aclarea —*Ta lamenta cu speculacionnan ta skeiro tur caminda

ORANJESTAD (AAN) – Diaranzon mainta, Minister di Husticia señor Rocco Tjon, a haya necesario pa yama un conferencia di prensa, pa aclarea cierto puntonan relaciona cu Stichting Imeldahof Aruba.

E mandatario a splica cu apesar cu e directiva bieu a retira, y cu tabata tin e palabracion cu lo bay mantene un silencio den media, pasobra esaki ta necesario pa tin trankilidad den Stichting Imeldahof, pa nan por atende cu e retonan, mirando toch e speculacionnan cu tin den media y vooral den cierto medionan di comunicacion, y cu por ta sigur cu no a sali for di su ministerio, el a haya necesario pa aclarea un ke otro.

E dignatario a subraya cu Imeldahof ta un fundacion completamente independiente, y cu ta carga un responsabilidad hopi grandi den nomber di Pais Aruba, y a comenta cu Pais Aruba, anualmente ta aloca miyones di florin pa nan por eherce nan tarea.

“Mirando cu nan ta e unico fundacion cu e responsabilidad aki, y cu ta e unico cu Pais Aruba ta confia cu e tarea aki tambe, ta importante pa percura cu aspectonan financiero di e fundacion, aspectonan cu ta toca e ‘Good Corporate Governance’ ta bon regla” Minister Tjon a señala.

El a agrega cu e por garantiza cu e unico interes di gobierno y di su persona como mandatario, ta garantiza seguridad fisico y emocional di tur e muchanan, cu ta na Imeldahof, y muy en particular mirando cu hopi bez, nan a pasa caba den un trauma, den un situacion familiar insigur, y ta pa e motibo ey nan ta na Imeldahof.

“Como mandatario responsable, nos tin un deber di señala cosnan cu no ta bon y ora di actua, obviamente, segun regla y ley, pero tambe ora nos ta confronta cu cosnan cu no ta bon, nos mester asumi responsabilidad tambe y percura pa bin un cambio”, e mandatario a expresa.

“Bisando esaki, tin puntonan cu a wordo treci padilanti na nos ministerio, cu ta toca e situacion financiero di e fundacion”, Minister Rocco Tjon a señala. Den un siguiente articulo e dignatario ta specifica mas den detaye.