Tin muchanan cu a ser interna den hospital door di “rotavirus” posiblemente adkiri den crèche

The content originally appeared on: Diario

No ta conoci si tin e vacuna aki na Aruba:

ORANJESTAD (AAN) – E siman aki, DIARIO a ricibi informacion door di algun mayor cu un par di siman pasa, mester a interna nan yiu chikito den hospital, pa motibo di un virus fuerte cu a causa deshidratacion.

E muchanan a haya test di, entre otro sanger y af, ya cu e habrimento formal di barica, sacamento y keintura, a pone e mucha bira hopi debil, desanima, y baha di peso.

Casualmente, DIARIO a haya informacion e momentonan ey di un huisdocter como tambe den botica, cu tabata tin un virus cu a ataca varios mucha cu ta bay crèche.

Ora cu e mayornan a haya resultado di e testnan a bin resulta cu nan tabata tin e asina yama “rotavirus” y ta parce cu e muchanan chikito cu ta bay crèche por ta mas vulnerable na esaki, y como e ta un virus basta contagioso un mucha por pasa e malesa na otro, sea door di  un coi hunga cu nan dos a uza, of tambe via manipulacion di alimento, posiblemente den e crèche tambe.

No por huzga cu e leidsternan no ta pone atencion suficiente na e muchanan cu nan ta cuida, pero si por sosode cu ora di manipula cu e alimento pa e mucha, por ehemplo un musca por a pasa mishi cu e cuminda sin ser nota. Tambe por ta cu por tin un trahador cu no a laba su man bon despues di a cambia un mucha su bruki, pasobra e rotavirus por pega tambe via af.

Despues cu e ley di crèche a pasa, no a bolbe scucha nada mas for di autoridadnan concerni, y hopi mayor tin e pregunta si nan ta eherce control riba e parti di higiene den crèche, entre otro aspectonan cu ta regarda e cuido di mucha, cu ta un trabao indispensable na Aruba debi cu hopi mama tin cu traha y no por keda cas cu su yiuchi chikito.

Tin indicacion cu tin vacuna contra rotavirus, pero no ta conoci pa e mayornan si na Aruba ta dispone di dje. E vacuna aki ta recomenda pa mayoria di baby y mucha den edad di bay crèche, pasobra e ta reforza nan defensa contra e virus.

Rotavirus ta conoci tambe como “griep di tripa” of “griep di stoma” y e ta causa sintomanan manera sacamento, diarea, keintura, desaliento y malestar general. E rotavirus ta ocasiona gastroenteritis. E peligro di e virus aki ta precisamente e deshidratacion y esaki mester wordo combati cu suero intravenoso, si e mucha no ta wanta nada likido den su stoma.