Temblor fuerte a sacudi Aruba riba Diasabra mainta trempan

The content originally appeared on: Diario

Tabatin magnitud di 3.1º grado

ORANJESTAD (AAN): Tabata Diasabra mainta ora apenas tabata falta 7 minuut pa 6’or bati, cu diferente persona a sinti un temblor fuerte, di cual algun bario a sinti esaki mas duro compara cu otronan.  Algun persona a raporta cu nan a djis sinti e sonido di ‘rumble’ cu tabata sona similar cu un truck pisa pasando den bario.

   Otronan a sinti con e sacudimento a hasta tembla e cama riba cual nan tabata drumi, y pesey a core spierta. Tin persona cu a raporta cu nan a sinti con nan bentana, y tambe porta di cas a tril. Tambe tin cu e sinti con e dak di zink riba nan cabez a produci un sonido raro.

   E epicentro di e temblor a wordo localiza na 12.30º Nort, y 70.25º West.   Esaki ta exactamente 33 km Zuidwest for di Wilhelminapark na Oranjestad.

   E epicentro ta ubica igual cu 41 km Zuid-Zuidwest di Beach di Arashi.  E ta mescos tambe cu 37 km West-Zuidwest di Pier di Zeerovers na Savaneta.  E ta igual cu 28 km di e punto mas panort di Cabo San Roman (Venezuela).

   El a wordo registra pa exactamente 5:53 am, y a conta cu un magnitud di 3.1º riba Scala di Richter.  E epicentro tabata na un profundidad di 94 km, y esey ta e motibo pakico el a wordo sinti casi tur caminda.  Mas hundo e epicentro, mas e temblamento ta wordo observa.

   E seismogram cu por mira aki den e imagen, ta mustra cu e temblor a cuminsa pa exactamente 5:53:49 am, pues faltando 11 seconde pa a bira 5:54 am.  Ningun informe a drenta oficialmente di daño causa na cualkier propiedad riba Aruba.