Tema di Festival di Buki pa Mucha lo ta ‘Dushi Cabesura!”

The content originally appeared on: Diario

ORANJESTAD (AAN) Na 2024 biblioteca ta invita tur mucha lesa mas storia y buki. Storia cu personahe poco rebelde, poco stout kizas, tocante mucha cu tin un kier,

mucha cu ta gusta dicidi pa nan mes y ta gusta aventura. Lesa buki pa mucha cu diferente personahe y lesa con dushi e ta pa haci cos manera bo ke!

Biblioteca Nacional Aruba ta presenta un otro edicion di su Festival di Buki pa Mucha. Na 2024 e tema ta ‘Dushi Cabesura!’

   Tur aña ta scohe un tema nobo pa duna e festival un ambiente diferente. Asina ta sigui stimula mucha pa lesa buki.

   E Festival di Buki pa Mucha ta dura un siman y ta tuma lugar den prome siman di November. Semper ta habri e festival cu un fiesta grandi cu ta tuma lugar diadomingo dia 3 di november 2024. Den e siman di dia 4 pa 8 di november hopi autor tanto di Aruba como for di Hulanda, Curaçao, Bonaire, St. Maarten y St. Eustatius ta bishita scol pa conta storia den klas y na biblioteca. Y ilustrador ta duna presentacion ta con nan ta ilustra storia pa mucha. Di e manera aki ta purba di entusiasma muchanan pa lesa mas, lesa hunto y bishita biblioteca mas. Miembrecia di biblioteca a bira gratis, cu ta un regalo pa tur mucha y tambe hoben bou 18 aña.

Un grupo grandi di escritor di buki pa mucha ta bishita mas cu 50 scol. Di Aruba esakinan ta: Liliana Braamskamp-Erasmus, Vanessa Paulina, Irmgard Frans, Emerita Emerencia, Ariana Koolman, Gino Vrolijk y Robert Reeberg.

   For di Bonaire biblioteca ta presenta: Segni Bernadina. Di Curaçao ta yama bon bini na Tio Ali, Mercee Doran y Crisen Schorea.

   For di Hulanda ta bini: Danielle Schothorst, Maria Karg y Sanne Rooseboom. Misha Spanner (Contado di cuenta) ta participa pa di dos biaha na e festival na Aruba y ta bini for di St. Eustatius. For di St. Maarten ta presenta Ralph Cantave. E grupo aki ta bishita scol pa conta storia, papia tocante buki cu mucha y tambe ta stimula mucha pa lesa mas.