Te cu dialuna 9 mil persona ya caba a ricibi e ‘booster-shot’ contra Covid-19

The content originally appeared on: Diario

Minister Dangui Oduber  —  *Aruba lo ta ricibiendo 45,000 vacuna extra

ORANJESTAD (AAN)– Dialuna mainta, durante un rueda di prensa di Gobierno hunto cu Crisis Team a duna informacion over e situacion y casonan di Covid19 aki na Aruba.

            Despues cu Gobierno a haya conseho for di Gezondheidsstraat di Hulanda, mes ora e dianan 26 y 27 di November, a cuminsa cu un Vacunathon pa asina por a duna ‘Booster Shot’ na tur 60+.

            Actualmente desde dia 14 december te cu 21 december a sigui cu ‘Walk-In’ na Centro Deportivo Betico Croes na Santa Cruz, pa comunidad por a busca vacuna cu nan falta, sea ta e prome dosis cuminsando for di 12 aña, di dos dosis of e booster shot cuminsando for di 55 aña. Te cu awe tin 9,000 persona ya caba cu a ricibi e ‘booster shot’.

            Poco poco ta bahando e edad di tuma ‘booster shot’. Tur siman ta baha e edad pa bin na remarke pa e ‘booster shot’. Esaki lo keda wordo haci te ora tur persona cu a ricibi nan prome 2 vacuna caba, den e ultimo 6 luna nan, ricibi nan booster shot tambe.

            Actualmente tin capacidad pa administra un 1,500 vacuna pa dia. Pero ta trahando duro pa yega na un capacidad di duna 2,000 vacuna pa dia. Pesey a pone na Centro Depiortivo Betico Croes na Santa Cruz e ‘Walk-In’ pa vacuna mas persona posibel.

             Otro aña lo usa tambe un bus cu lo pasa den bario unda por vacuna un 200 persona pa dia. E idea tambe ta pa por tuma ‘booster shot’ na MFAnan, pa asina facil e comunidad por acudi eynan pa vacuna tambe.

            Diabierna ultimo tabata tin un Vierlanden overleg, unda Staatssecretaris Blokhuis a duna un bon noticia. Hulanda a bai di acuerdo pa extende e cooperacion cu nan ta dunando na pais Aruba pa 6 luna adicional, cual lo mester a termina 31 December 2021. Esaki tabata un bon noticia despues cu Aruba a haci e peticion pa Hulanda extende nan yudansa, teniendo na cuenta cu tin e Omicron na Aruba y tambe con e situacion di Covid ta birando rond mundo. Staatssecretaris Blokhuis a confirma cu Gobierno di Hulanda lo ta dispuesto pa duna Aruba e cooperacion necesario, pa asina tin mas asistencia na hospital y tambe na DVG si mester.

            Hulanda  tambe a confirma cu Aruba lo ta ricibiendo 45,000 vacuna extra. Esey kiermen cu Aruba ta bai tin suficiente vacuna pa duna booster shot y tambe pa por duna na tur persona cu no a tuma nan vacuna ainda. Tambe e vacuna lo ta pa tur mucha, di 5 aña pa 12 aña, cu tin un condicion special.

            Di tur estadistica di hospital ta keda demostra cu 80% di persona cu ta wordo admiti na hospital den e seccion di Covid, den departamento di ICU of cu a fayece, ta persona nan cu no tabata vacuna. Pero tambe e persona nan cu a ricibi vacuna mas cu 6 luna pasa, tambe nan efectividad ta bahando. Y ta pesey ta recomenda pa tuma e booster shot mas pronto cu ta posibel, paso esaki ta aumenta e efectividad pa rond di 95%.

            E vacuna ta keda duna resultado y nos ta urgi esnan cu ainda no a tuma esaki, pa tuma esaki mas pronto cu ta posibel. Walk-in pa vacuna na Centro Deportivo Betico Croes, na Santa Cruz a wordo extendi te cu dia 21 di December. Otro aña lo sigui duna vacuna y ‘booster-shot’ den luna di januari. Minister ta conseha tur hende cu no a vacuna pa haci esaki mas pronto cu ta posibel.