Tayer di Leadership & Management na Centro di Bario Noord a yega na un exito rotundo

ORANJESTAD (AAN): E tayer di dos dia di Leadership & Management, organisa na Centro di Bario Noord, a yega na un exito rotundo.

Durante dos dia intensivo di enseñansa y inspiracion, participantenan di diferente seccion di comunidad tabata tin e oportunidad pa desaroya nan habilidadnan di liderazgo, maneho y trahamento deni ekipo, tur den un ambiente positivo y motiva.

   E tayer a ser guia pa RS Cube Solutions y Sr. Richenel Stamper, un profesional cu hopi experiencia den area di liderazgo organizacional, desaroyo personal y maneho di talento humano. Sr. Stamper a comparti conocimiento practico y teoria relevante pa e realidad di Aruba, cu a yuda e participantenan pa compronde miho con lidera cu efectividad y con motiva otro pa logra exito.

   E programa di dos dia a combina presentacion, discusion y dinamica di grupo, cu a permiti e cursistanan pa siña tanto di manera teorico como di experiencia practica. A trata tema importante manera comunicacion efectiva, maneho di conflicto, tuma di decision, responsabilidad di lider y motivacion di grupo. Segun hopi di e participantenan, e tayer a duna nan un perspectiva fresco riba con lidera cu proposito y con mantene un ambiente di trabao saludabel y productivo.

   E actividad a bira ainda mas especial pa motibu cu a duna den Papiamento, idioma materno di nos pueblo, cu a facilita comprension y participacion di tur hende. “Ta un placer pa por siña y comparti conocimiento den nos propio idioma. Asina nos ta sigui fortalece e valor di Papiamento den ambiente profesional,” un di e participantenan a remarca.

   Na fin di e dos dia, tur e cursistanan a ricibi nan certificado di participacion, un merecimento pa nan dedicacion y esfuerzo durante e tayer. Centro di Bario Noord a expresa nan felicidad y orguyo pa e grupo di participantenan cu a mustra gran interes den desaroyo profesional y crecimiento personal.

   Un gran danki ta bay pa RS Cube Solutions y Sr. Richenel Stamper pa nan excelente guia, pasenshi y entrega durante henter e tayer. E centro ta mira cu entusiasmo pa continua ofrece oportunidadnan educativo y formativo pa su comunidad, fortaleciendo asina e base di liderazgo local y empoderacion social.

   E exito di e tayer di Leadership & Management ta mustra claramente cu e comunidad di Noord ta cede den un rumbo positivo di enseñansa continuo. Centro di Bario Noord ta compromete pa sigui traha na mas programa cu ta inspira, forma y uni nos comunidad.