Ta start plan di alivio pa e holo di Parkietenbos

The content originally appeared on: Diario

Ministro Ursell Arends:


“Awo nos ta bay pa e holo” 

ORANJESTAD (AAN): Un holo desagradabel a plama riba Aruba siman pasa na momento cu biento a cay. Apesar di cu a cera Dump mas cu un aña pasa, ainda esaki tur dia ta produci un holo repulsivo.

   E siman aki e holo di dump a lanta den memoria di habitantenan di Parkietenbos recuerdo di loke nan mester a soporta den tur e añanan prome cu a cera dump na 2022. Pero e problema di holo di dump ta bon conoci cerca Minister Arends di Naturalesa. E problema di holo ta solamente un di e varios proyectonan cu mester completa den e proceso di sanea dump. Esaki ta e proximo riba lista.

   Den fin di siman e minister a duna un bista riba e plan cu tin pa reduci y elimina e holo cu dump ainda ta produci. “Prome nos mester a paga e candela grandi y stop sushi di subi dump. Esey a logra. Awo cu nos tin control di e superficie y e tereno nos por ataca e holo,” ta loke Minister Arends a declara den fin di siman.

   “E sushi ta produci diferente tipo di gas y den subsuelo tin candela bou di e capa di tera. Tin 70 aña di sushi cu ta kimando lentamente bou tera y ta produci huma y un holo malo. Awe ta mas cu un aña cu no por tira sushi eyriba pa kima. Ta mas cu 12 luna sin cu tin candela grandi riba e tereno. Pero nos a keda cu un cero di sushi y awo nos mester atende cu esey,” minister Arends a splica.

   “Nos tin un heat scan di e tereno completo. Asina nos a localisa unda tin foco di candela den subsuelo. Mayoria di kimamento ta den e parti noord-central di e tereno. E descomposicion biologico y kimico cu ta sosode den e subsuelo ta produci di diferente tipo di gas peligroso cu alavez ta keda fuel e smouldering,” minister a remarca.

   Ministerio di Naturalesa ta trahando cu expertonan internacional riba e strategia con ta paga e candela ey. Candela den subsuelo no ta facil pa paga. Pero no ta imposibel y tin diferente forma con pa haci’e. Minister Arends a percura pa pone fondo den presupuesto pa cubri esaki tambe. Awor cu presupuesto ta cla cosnan por cuminsa move. Den prome mita di e aña aki Ministerio di Naturalesa lo hiba un campaña informativo pa asina tur hende por ta na altura di loke a haci caba y kico mas tin di haci. Ceramento di dump tabata solamente un prome paso pa e futuro di Parkietenbos.

   Minister di Naturalesa personalmente a haci un recorido den e bario y a bishita tanto e dump di Parkietenbos como e tereno na Sero Tijshi. A keda claramente constata cu ta e holo di e kimamento lento bou suelo di dump pero sin candela, ta loke ta baha riba Parkietenbos y Bucutiweg.