Ta pidi gobierno pa bay mesa bek cu Hulanda y negocia un miho deal

Parlamentario Evelyn Wever-Croes den nomber di 10 mil firmante

ORANJESTAD (AAN): Parlamentario pa Partido MEP, Evelyn Wever-Croes, den nomber di 10 mil firmante, ta pidi gobierno pa bay mesa bek cu Hulanda, y negocia un miho deal cu loke actualmente tin den e ley di HOFA. E ley manera e ta awo, segun e parlamentario di MEP, tin riesgo y desventahanan pa Aruba cu por causa hopi dolor y sufrimento. Rijswet HOFA ta mina nos autonomia. Pa cua motibo Fraccion di MEP den Parlamento ta contra ley aki. 

Den nomber di votadornan di Partido MEP y den nomber di casi 10 mil ciudadano di diferente partido politico cu a vota contra e ley di reino aki, Fraccion di MEP ta propone, mirando e hecho cu tin hopi otro alternativa, cu no tin mesun consecuencianan devastador pa Aruba cu e ley di reino HOFA, pa Gobierno di Aruba bay mesa bek di negociacion y negocia algo miho pa Aruba, y haci esaki sin miedo. 

E parlamentario a sugeri pa ancra e cambionan cu tin riba mesa y cu ta na beneficio di Aruba, den e ley local LAFT cu nos tin caba. Y si acaso tin mester mes di un areglo di ley di un nivel mas halto, por considera e instrumento di e acuerdo mutuo manera Raad van State a conseha. “Pero den tur caso, respeta e autonomia di nos pais”, Parlamentario Wever-Croes a enfatisa. 

Parlamentario Wever-Croes a cita loke profesor Nicolaï a bisa: “Ningun parlamentario cu un poco tino, lo aproba algo cu ta mina autoridad di e Parlamento di Aruba y sigur no si e ta contra nos constitucion”. 

“Awor ta e momento pa nos pone nos diferencianan un banda, pa nos uni y convence gobierno pa bay mesa di negociacion bek. Manera Betico Croes a bisa, un pueblo chikito por logra cosnan grandi si nos kere den nos mesun poder. Aruba tin poder, sabiduria y e curason. Y nos no tin mester un otro pais, un otro gobierno bin manda riba nos”, Parlamentario Evelyn Wever-Croes a expresa.