Ta Hulanda a dicidi cu cortamento 12.6% ta bira un condicion y no te December 2020 sino ‘tot nader order’

The content originally appeared on: Diario

Minister Presidente cu aclaracion: — ORANJESTAD (AAN) – Den conferencia di prensa di Gobierno, Dialuna 15 di November awo, Prome Minister a hiba palabra y a referi na diferente tema,


y un di nan ta e 12.6% cu e ta considera importante pa trece un aclaracion dilanti, ya cu el a haya varios pregunta, entre otro tambe di prensa, pero no tanto di sindicato pasobra siman pasa el a reuni cu e gremio sindical, y a papia di esaki extensamente.

E mandatario a splica cu 12.6% ta e porcentahe cu ta wordo corta for di e salario di personanan cu ta traha den sector publico y semi-publico. “Aña pasa, ora e pandemia a bati den nos porta, y nos a mira cu nos ta bay keda sin entrada, pasobra nos a cera frontera, nos tabata man na cabes y nos mester a busca solucion.

Na e momento ey e mercado financiero di Merca a cuminza cera, y no a habri mas pa nos. Nos no por a presta placa mas eynan. E ora ey, e unico cos cu a keda nos ta pidi Hulanda pa presta nos. Manera tur hende sa, prome cu esey nunca Hulanda a presta nos placa. Ta door di e pandemia nos a haya nos mes obliga y forza na presta placa for di Hulanda”, e dignatario a señala.

Prome Minister a indica cu prome cu el a bay Hulanda el a papia cu tur sindicato, tanto di sector publico como semi-publico y di sector priva. Tur sindicato gobierno a yama hunto, y a bisa nan cu pa Aruba por sobrebibi gobierno tin algun paso cu mester bay tuma, y cu mester di nan sosten.

“Nos a propone pa corta cu 12.6% na sector publico y semi-publico, nos a pidi sector priva tambe cooperacion, y pa loke ta wordo corta, bay den un fondo pa FASE, pa nos por a yuda tur esnan cu tin mester di e sosten financiero aki, cu nos a bin cune durante e pandemia”, Minister Presidente a declara.

Premier Wever-Croes a sigui bisa cu e proposicion inicial cu gobierno a bin cune na April 2020, ta pa un y tur entrega te 31 di December 2020, anto pa weita despues kico ta kico, pero pa e momento ey esey ta loke gobierno a mira como necesario pa bay negocia na Hulanda.

Gobierno a cuminza papia cu Hulanda mientras e sindicatonan tambe a acudi na VNO y na Hulanda, pasobra nan no tabata di acuerdo cu esaki. “Y diripiente Hulanda a bin cu e condicion e ora ey, cu Aruba mester corta 12.6% te proximo aviso. Kiermen, inicialmente nos a invita sindicatonan, y no tabata un condicion di Hulanda; e tabata algo cu nos a pidi tur hende pa ban coopera pa nos por a lanta e fondo di FASE, pa nos por paga esnan cu a perde trabao y cu mester di e sosten di FASE. Pero na caminda, nos a mira cu Hulanda a bin aden y a bisa cu pa Aruba sigui haya sosten di likidez bo mester corta, y el a bira un condicion te otro aviso. Kiermen, e no ta caba na aña 2020 sino te proximo aviso”, e dignatario a subraya.