Ta hopi importante pa mayornan siña alternativanan y no recuri na dal nan yiu

The content originally appeared on: Diario

Shennelyn Croes, Trahado Social Preventivo di Fundacion Respeta Mi

ORANJESTAD (AAN): Shennelyn Croes, Trahado Social Preventivo di Fundacion Respeta Mi a indica cu ta hopi importante pa mayornan di tur edad, siña e alternativanan na lugar di dal of klap nan yiu, pasobra ta facil pa bisa, ‘no dal mas’, pero mester siña e mayornan kico nan por haci na lugar di esey.

   Croes a bisa cu mayoria di persona cu ta registrando na nan workshop, ta mayornan hoben cu yiunan chikito, cu ta hopi interesa pa sa riba otro alternativa con pa lanta nan yiunan, cu no ta mescos cu antes. El a bisa cu nan tin diferente charla dirigi na diferente grupo di mayor.

   E fundacion ta haci uso di diferente medionan social pa haya atencion di cierto grupo di mayornan cu ta mas riba medionan social, pero mayoria di biaha, nan charla ta habri pa mayornan di tur edad. Croes a expresa cu rednan social ta yuda hopi na momento di alcansa mayornan, specialmente esnan mas hoben cu ta hopi den rednan social.

   Dia 12 di April Fundacion Respeta Mi lo lansa nan jingle, pa promove y hiba e mensahe pa esnan cu por ta no ta worry pa atende e charlanan. Nan ta spera cu e jingle por cuminsa na concientisa comunidad.