Ta bay caba c’un otro aña cu ta bay keda solamente na promesa pa loke ta trata e edificio nobo di Aduana

The content originally appeared on: Diario

Edward Maduro di Sindicato SADA:

ORANJESTAD (AAN):   Edward Maduro di Sindicato di Aduana (SADA) a indica cu gobierno ta goberna e pais, pero tambe tin un pechi como dunado di trabao y ora di sinta na mesa cu e sindicatonan mester pone e pechi di gobierno un banda, a bisa.

            Gobierno con cu bay bin ta dunado di trabao y mester ta un ehempel pa esnan den sector priva. Ta wak cu ambtenaarnan ta wordo neglisha formalmente. “Mi tin cu bisa cu e aña aki no tabata nada positivo sigur pa nos di e vakbond. Mi ta kere cu tur e vakbondnan ta pasando mesun cos. E casonan den Corte ta keda aumenta danki na no ta integro di parti di DRH. Hopi ambtenaar ta bayendo corte contra e bevordering cu ta wordo vertrak”, Maduro a indica.

            Pa loke ta ‘prestatie management’, riba esaki e sindicatonan no a haya ningun clausura. E sindicatonan no ta contra ‘prestatie management’, pero e manera con e ta wordo ehecuta y describi den e ley ta dificil pa tur hende comprond’e, a agrega.

            Maduro a bisa cu den Cuerpo di Aduana a ehecuta e ‘prestatie management’ e aña aki pero leu di ta manera e mester ta. Tin hopi discrepancia pa locual ta trata e trahadonan di Cuerpo di Aduana. E leiding no kier ehecut’e manera nan ta wordo splica pa e wordo ehecuta.

            E sindicalista a mustra cu a pesar cu a señala esaki na Departamento di Recursonan Humano atrobe ta wak cu nan no kier crusa cu otro.

            Ta bay caba c’un otro aña cu ta bay keda solamente na promesa  pa loke ta trata e edificio nobo di Aduana. Ainda e ni e prome piedra a wordo poni y nada no a wordo haci. E edificio actual unda Aduana ta ubica no ta nada agradabel y nunca e edificio ey a wordo uza pa termino largo pasobra e no ta adecuado.

            Maduro a lamenta cu nan tey ainda y no sa pa cuanto tempo pasobra te di di awe no a ni roza e tereno ni pone e prome bloki.