Suriname saliendo bek poco-poco di e crisis causa pa awaceronan torencial

The content originally appeared on: Diario

PARAMARIBO: E ultimo tres simannan cu a pasa, Suriname a wordo azota pa un crisis di emergencia,

cu a laga decenas di persona sin cas, y tur esaki causa pa awaceronan torencial.

   Hopi pueblo ta keto bay bao di awa, y esaki a pone cu ciudadanonan a perde hopi material den nan hogar.  Varios edificio di scol a keda sin cu nan por wordo usa bek por lo pronto.  Debi na e awaceronan torencial aki, mester a hasta laga awa basha for di e dam Brokopondostuwmeer pa evita cu esaki lo por kibra.  Y esey a pone cu pa colmo hopi pueblo a wordo inunda.  Y loke tin habitantenan ainda furioso, ta cu ningun autoridad a duna nan advertencia cu esaki lo bay socede.

   Como 12.000 habitante for di 35 pueblo parti zuid di Paramaribo a wordo afecta pa e awacero torencial aki.  Hopi habitante a perde tur cos.  Den e pueblonan, hasta nan cuarto di warda material a bay perdi, incluyendo alimento.

   Na Paramaribo tambe debi cu e sistema di riolering ta hopi ineficiente, ta un gran parti di e ciudad a keda bao awa.  Plasnan gigantesco estilo dam a rondona cayanan, y pone cu ningun vehiculo por pasa mas.

   Den pasado, Gobierno a yega di instala algun pomp potente na cierto lugar pa evita inundacion, pero ta parce cu ni esakinan no por a yuda e biaha aki.  Pasobra e awa cu e pomp ta pusha pa un otro lugar, toch via rieu y rooinan, ta spula bin bek den ciudad.

   Mientras tanto, den fin di siman Gobierno di Paramaribo a anuncia cu a cera un contract di emergencia cu algun contratista pa asina nan drecha algun caminda principal di Paramaribo, Wanica, y tambe di Para.  Nan a keda basta destrui door di e awacero y inundacion.  Tambe a cuminza cu trabao mesora cu e sistema di riolering.  Pasobra Servicio Meteorologico di Suriname ta pronostica cu pa e temporada venidero lo bay tin mas awacero ainda na bista.

   Riba e potret por mira con nivel di awa a yega te na rand di dak di e casnan den distrito di Brokopondo.