Stichting Lezen a yuda Biblioteca Nacional Aruba cu material pa e proyecto di BoekStart

The content originally appeared on: Diario

ORANJESTAD (AAN): Diaranson atardi Minister Endy Croes a reuni cu sra. Astrid Britten, directora di Biblioteca Nacional Aruba y sr. Adriaan Langerdonk cu ta ‘Program Coordinator’ di Stichting Lezen.

Stichting Lezen a yuda Biblioteca Nacional Aruba cu material pa e proyecto di BoekStart.

            BoekStart ta un proyecto pa laga baby of peuter cera conoci cu buki hunto cu su mayor. E initiativa aki tin como meta pa laga mayor y e chikitin cera conoci cu lesamento. Lesamento den bos halto pa baby ta stimula e desaroyo di idioma pero tambe fortifica e laso y conexion entre mama/tata y yiu.

            BoekStart ta consisti di un maletin chikito cu ta contene 2 buki. Un ta di tela y material suave specialmente desaroya pa un baby por hunga cu ne. BoekStart ta un campaña cu a keda implementa na Hulanda cu hopi exito.

            Stichting Lezen ta wordo subsidia door di Ministerio di Enseñansa di Hulanda y via ‘Stimuleringsfonds’ por duna e islanan den Reino Hulandes sosten na placa y material.

            Den  cuadro di esaki no solamente BoekStart kier bin cu un proyecto pa dos scol piloto cu mester tin un biblioteca na nan scol, unda nan lo ricibi diferente programa como tambe educa e docentenan tambe pa stimula e muchanan di scol preparatorio pa scol basico pa nan tin mas interes pa lesa.

            Pa finalisa Minister Endy Croes a informa cu hunto cu Biblioteca Nacional Aruba lo percura pa crea dos scol piloto pa por cuminsa cu e programa aki.