Stichting Hunto a bira realidad y un simbolo di speransa y inovacion pa e isla

The content originally appeared on: Diario

Michella Steenvoorde-Lacle:

ORANJESTAD (AAN): Salud di nos comunidad no ta worde midi solamente pa e bienestar fisico di su miembronan, pero tambe pa e forsa di su sosten pa esnan cu ta enfrentando desafionan di salud mental y adiccion. Stichting HUNTO ta un bon ehempel di locual nos por logra hunto y nos tin pleno confianza cu su impacto lo worde sinti pa e generacionnan cu ta bin.

   Michella Steenvoorde-Lacle a indica, cu laga nos sigui for di aki cu e compromiso pa sigui sostene, eleva, y cuida cada miembro di nos comunidad, sigurando cu e portanan di Stichting HUNTO no ta djis un entrada di un edificio mas, pero un portal pa un futuro mas saludabel y prospero pa un y tur.

   Recientemente a marca un paso significativo den e trabaonan continuo pa un enfoke mas compasivo, inclusivo y efectivo pa cu cuido di salud mental aki na Aruba. Minister di Husticia y Asuntonan Social sr. Rocco Tjon y Gabinete Wever-Croes II ta haciendo loke hopi politico den pasado no a haci, inverti den prevencion. E beneficio di e proyectonan aki no solamente ta pa e clientenan actual, pero nan lo conoce un impacto grandi riba destino di nos futuro generacionnan. 

   Pa hopi aña e retonan di salud mental a domina grandemente den nos comunidad, hopi biaha man den man cu silencio, stigma y escasez di recursonan. E apertura di Stichting HUNTO no solamente ta simbolisa e integracion fisico di locual ta psikiatria y tratamento di adiccion bou di un solo dak, pero tambe ta muestra di nos compromiso colectivo pa kibra e bareranan existente pa cu esakinan. E iniciativa aki, cual ta alinea cu e maneho di Ministerio di Husticia y Asuntonan Social, pa mehora accesibilidad pa servicionan di salud mental, ta yuda tambe pa trata e listanan largo di espera cu tin, sigurando cu e yudansa ta disponibel pa esanan den necesidad na momento cu mas nan tin mester di esaki.

  Cu e inauguracion di Stichting HUNTO, nos ta para keto pa reconoce e lucha cu esnan cu ta enfrentando problemanan di salud mental y adiccion ta pasando aden. Nos ta reconoce e curashi inmenso cu e ta tuma pa busca ayudo y e resiliencia pa supera e retonan aki. Stichting HUNTO ta para como un testimonio cu salud mental ta un parti integral di salud general y cu merece e mesun atencion, cuido y recursonan manera cualkier otro aspecto di nos bienestar.