SKOA a gana su caso riba pago di schoolgeld y placa di airco

admin

Pendiente di e caso mas profundo cu ainda ta andando

skoa_ORANJESTAD (AAN): Diamars  mainta Hof di Corte Superior a dicta sentencia den e apelacion di Stichting Katholiek Onderwijs Aruba (SKOA) contra un grupo di persona kendenan den Corte den Promer Instancia a gana nan caso caminda Hues a ordena cu no mester paga schoolgeld y placa di airco.

   DIARIO ayera mainta a papia cu abogado mr. Figaroa kende ta representa e grupo di persona. Ta asina cu tin un caso profundo ta andando cu e grupo di persona a cuminsa caminda for di awor ta pidi pa prohibi SKOA cobra e placa di school y e placa di airco.

   Mr. Figaroa a splica cu den e caso di apelacion, Hof a destrui e sentencia di Corte den Promer Instancia cu tabata na fabor di e grupo di persona y Hof a dicta sentencia nobo. Hof ta haya cu SKOA por cobra e placa di school y e placa di airco.

   EVALUACION DI HOF:

   DIARIO a haya copia di e sentencia di Hof caminda ta mustra cu SKOA a aumenta e “schoolgeld” di 75 pa 175 Florin y esaki mester worde paga na momento di inscripcion. Tambe tin e placa di airco, cual no a worde introduci door di SKOA sino door di comision di mayornan y esaki ta 150 Florin. Esaki ta mas bien pa e schoolnan cu tin airco.

   Hof ta mustra cu segun articulo 28 di e tratado cu gobierno di Aruba a ratifica relaciona cu e Derecho di un Mucha, ta para cu Gobierno ta reconoce e derecho di studio pa un mucha. Gobierno a stipula cu estudio ta obligatorio y cu pa tur hende ta gratis.

   Articulo 13 di e tratado internacional relaciona cu derechonan Economico, Social y Cultural, Gobierno ta papia di estudio obligatorio pa un y tur y cu esaki ta gratis. Tambe Gobierno ta papia di estudio secundario disponibel pa tur hende y tambe gratis.

   AINDA GOBIERNO NO A INTRODUCI LEY:

   Relaciona cu e caso, Hof ta mustra cu e pregunta cardinal den e asunto aki ta si Gobierno ta paga 100% e gastonan di placa di school. Hof ta haya cu esey no ta e caso. Hof ta mustra cu ainda Gobierno no a tuma e base legal pa introduci enseñanza gratis. Hof ta señala cu ni den e Ordenanza di Enseñanza y tampoco den “Staatsregeling” no ta para enseñanza gratis.

   Apesar cu tanto articulo 28 di e tratado di Derecho di un Mucha como articulo 13 di e tratado di derechonan Economico, Social y Cultural ta mustra Gobierno pa substancialmente introduci e ley di enseñanza gratis. Hof ta mustra cu segun e “Staatsregeling” e obligacion di Gobierno pa cu enseñanza ta depende di e medionan financiero di Gobierno cu mester worde aproba door di e Minister di Enseñanza.

   Den e situacion actual ta asina cu Gobierno no ta pagando solamente un parti di e gastonan pa cu enseñanza na SKOA.

    SKOA POR COBRA SCHOOLGELD:

   Hof ta mustra cu awor cu Gobierno no ta cubri tur e gastonan pa cu enseñanza, SKOA por aumenta e placa di school pa asina por paga e resto di gastonan cu Gobierno no ta pagando.

   Pa loke ta e suma di 175 Florin, Hof ta mustra cu por bisa en general cu e suma aki no ta perhudica un mucha pa haya enseñanza. Pa cu esaki Hof ta tene na cuenta cu SKOA tin e posibilidad di por yega na un areglo di pago y eventual esnan cu no por paga lo por haya asistencia di Direccion pa Asuntonan Social pa haya un subsidio.

Pa loke ta e placa di airco, Hof ta haya cu SKOA por cobra esakinan hunto, aunke cu e placa di airco no por tin influencia riba e inscripcion di e mucha na school. Hof a mustra cu SKOA mes a mustra cu e placa di airco no ta obligatorio y keda sin paga esaki, no tin consecuencia pa e mucha na school.

HOF su conclusion ta cu e demanda di e grupo di personanan mester worde rechaza.

   DECISION:

   Hof a dicidi cu e ta destrui e sentencia den apelacion. Hof ta rechaza e demanda di e grupo di persona. Hof ta ordena e grupo di persona pa paga e gastonan di e caso cu ta algo mas cu 1.100 Florin y e gasto di abogado cu ta 6.600 Florin.

Esey ta nificia cu e grupo mester paga e placa di school pero no e placa di airco. Ta asina cu ainda e caso mas profundo ta andando y e decision ey lo bira interesante.

Next Post

Aruba Art Fair ta e plataforma cu lo reactiva arte y cultura den San Nicolas

Natusha Croes ta Artistic Liaison di Ministerio di Cultura ORANJESTAD (AAN): Diaranson 22 di juni tur luz lo ta riba San Nicolas ora cu oficialmente lansa Aruba Art Fair. Natusha Croes cu ta e artistic liaison di Ministerio di Cultura, ta splica cu Aruba Art Fair ta un plataforma cu […]