Situacion financiero sano mester sirbi interes di Pueblo

The content originally appeared on: Diario

Reduccion prima di Pensioen di AZV  ta un prueba importante


Recompensa pa sacrificio di Pueblo mester ta bienestar 

ORANJESTAD (AAN) Ta cu satisfaccion mester a tuma nota di e hecho cu e fraccionnan di e partidonan MEP y Raiz, cu ta sostene Gobierno Evelyn Wever-Croes, a pasa un mocion den Parlamento di Aruba den cual ta pidi pa sondea e posibilidad pa durante 2024, e prima di Pensioen di AZV wordo reduci.

Esaki ta nifica, cu e dos partidonan cu ta sostene Gobierno den Parlamento di Arubam ta pidi pa mira con por baha e peso di gastonan importantisimo pa un grupo di comunidad, cu sigur mester beneficia di tur adelanto economico y financiero di e pais.

Democracia ta conoce un momento importante, ora gobernacion na un forma responsabel, ta haci posibel pa Pueblo no solamente ta pagador di impuesto y otro primanan oficial manera di aseguronan social, pero tambe cu Pueblo ta beneficia di e leynan cu mester garantisa un base humano pa tur ciudadano.

Un bon gobernacion ta deshaci di politica partidista pa habri caminda pa politica cu ta sirbi e comunidad directamente loke na su turno ta haci posibel pa ciudadanonan por sirbi interes di nan pais.

Esaki ta nifica realmente, cu e ciudadano den un democracia real pa medio di nan aporte financiero na nan pais, tin e garantia cu nan trabou tin como resultado, cu nan por aporta na nan pais pa medio di belasting.

Na hopi ocasion DIARIO a mustra cu belasting den un gobernacion limpi y husto ta e forma, cu un ciudadano ta entrega placa na politiconan cu e ta duna su confiansa, pa nan por percura pa e pais funciona na interes di tur hende.

Segun e sistema democratico, e ciudadano, ta entrega parti di e produccion di su trabou cu ta su entrada, na Gobierno pa percura cu e por ricibi servicionan cu e comunidad mester, pa e por ta na beneficio di e ciudadano.

Cuido Medico ta central den bida di un persona y mester ta garantisa na un pais, aunke DIARIO no ta bandona su posicion cu un pais democratico no mester a introduci un sistema obligatorio pa tur ciudadano sin mas, pero mester a ensancha e opcionnan cu tabata tin antes pa diferente grupo den comunidad.

Importante na e momento aki ta keda, cuanto e ciudadano mester entrega na AZV di su entrada, sigur den un tempo di problemanan serio cu ta afecta e forsa di compra y sobrevivencia di tur ciudadano.

Un pais den estado di bancarota, no ta capaz pa sirbi su Pueblo cu ta paga belasting. Un pais den estado di bancarota, solamente por bira un herment pa mentira politico cu ta afecta e ciudadano manera  debe nacional di Aruba ta mustra claramente.

Awe e realidad di bon gobernacion ta bini dilanti, pasobra ta cu medidanan a drecha e situacion financiero di Aruba y asina a garantisa cu por sirbi bienestar di tur ciudadano den cual sigur e forma cu por enfrenta malesa, ta hunga un papel importante.

E peticion cu partidonan MEP y RAIZ a entrega den Parlamento pa mira con por baha e peso di AZV pa pensionadonan, cu ta e grupo cu a yuda sembra e bienestar di Aruba, ta prueba di un bon gobernacion y un bon funcionamento di democracia, cu ta e base mas solido di un comunidad feliz!