Sin reforma maneho financiero na 2017, Aruba lo a zink!

The content originally appeared on: Diario

Analisis di e realidad financiero di Aruba y e les di tempo

*No por ripiti desastre Mitar BBO den un mundo den resecion

*Maneho Wever-Croes a deshaci di e circo politico corupto 

ORANJESTAD(AAN)- Falta menos cu tres luna, pa 2023 anuncia su mes. Con exactamente e entrada pa 2023 lo ta y kico mundo por spera, ta sumamente dificil pa bisa.

Sinembargo, si analisa e historia gubernamental di Aruba, por mira claramente cu Aruba a conoce un reforma di maneho financiero na 2017, cu a evita cu Aruba lo a zink mas ainda na momento cu a resulta cu Citgo tabata otro parti di e mundo di fantasia cu Gobierno Mike Eman a laga atras pa Aruba.

Ta e decision na urna electoral na 2017, a haci cu e Arubiano a scapa Aruba di un desastre total, cu ta e maneho financiero di Mike Eman, cu tur hende tabata aplaudi.

Pa analisa kico Gobierno Evelyn Wever-Croes a logra pa Aruba y pa e Arubiano for di 2017, mester analisa tur loke ta pasa awe na Aruba.

Na prome lugar e holor di corupcion cu den Sala di Corte di Husticia ta presente ora figuranan di Gobierno Mike Eman mester duna cuenta y razon na Huez, ta cubri e Arubiano cu berguera y asco.

Mas ainda ora bini dilanti cuanto hende a stima Mike y Benny, loke ta un experencia historico pa politica di Aruba y a produci algun remarke historico di Huez.

Aruba lo por a guli tur caso di corupcion, manera di benta di permiso di trabou tambe dor di Gabinete Mike Eman, si a laga sikiera un pan chikito pa e Pueblo atras.

Na 2017, e orguyo di Aruba a wordo transforma den humiliacion den Reino cu mester a scapa Aruba di bati bancarota.

Trabou di Gobierno Wever-Croes, den cual sigur Prome Ministro Evelyn Wever-Croes y Ministro di Finanza Xiomara Maduro, mester wordo reconoce, ta bini dilanti.

E fiesta cu placa di e Arubiano a caba. Medidanan mester a wordo tuma na 2018 dor di Gobierno Wever-Croes cu ni sikiera tabata na haltura cu den futuro Aruba lo a wordo confronta cu situacionnan dificil cu a duna prueba di e dolor cu e abuso cu Mike Eman a haci cu placa di Pueblo, a produci.

Awe Aruba mester prepara pa un futuro, den cual no tin lugar pa ningun movecion politico di promesa falso cu solamente ta herida e Arubiano na un forma mas pisa den futuro.

Mescos cu henter mundo, Aruba mester prepara pa un futuro sumamente dificil di recesion internacional cu hasta por afecta turismo.

Na e momento aki Gobierno mester percura pa un posicion financiero responsabel pa e por actua manera tabata e caso na momento di pandemia cu a destrui Aruba.

Awe Aruba mester sigui cana. Ta e bon trabou responsabel di Gobierno Wever Croes cu a pone un fin na fiesta y corupcion, ta haci cu Aruba por planea un futuro  ora recesion mundial anuncia su mes na 2023.