Si gobierno no haya e sosten di likidez tin cu para Subsidio di Salario y FASE

The content originally appeared on: Diario

Minister Presidente Wever-Croes: — *“Pasobra si no tin placa, simplemente no tin placa!”


ORANJESTAD (AAN) – Loonsubsidie tambe ta un tema cu CAft a trece dilanti y nan ta di opinion cu esaki tambe por cuminza stop di biaha. Asina Minister Presidente a duna di conoce, den conferencia di prensa di Gobierno, Dialuna 1 di November awo.

            Segun CAft na 2020, comercio a cobra 59 miyon florin di mas na Loonsubsidie, y esey a wordo constata den controlnan, y esnan di 2021 ta andando ainda.

“Ademas, nos sa si cu loonsubsidie ta mantene e companianan artificialmente na bida. Pues, esaki tambe ta e recomendacionnan. Nos a scucha e recomendacionnan di CAft y nos ta delibera riba nan, nos tin dialogo riba nan. Mientras tanto, mi por a tuma contacto cu cierto gremionan comercial den fin di siman, pa haya sa nan prome pensamento riba e desaroyonan aki, y mi ta aprecia nan colaboracion di semper di duna nan puntonan di bista, y nos ta kere sinceramente cu, enberdad, loonsubsidie y FASE mester cuminza yega nan fase final pero no abruptamente, entrante 1 di November”, Minister Presidente a subraya.

            E dignatario a expresa cu den esey nan ta sinta y mira con nos ta sali afo. “Honor na e berdad ta cu si nos no haya sosten di likidez, nos tin cu para e dos medidanan aki di sosten aki mas tempran, pasobra si no tin placa, simplemente no tin placa”, Minister Presidente a expresa.