Shon A Eman: Abogado di Pueblo

The content originally appeared on: Diario

Conmemoracion 55 aña fayecimento:

          Aruba ta e nomber cu a compaña Cornelis Albert (Shon A) Eman for di dia cu el a nace dia 17 mei 1916 te dia cu el a fayece, dia 13 di juli 1967. Shon A Eman a lanta di mucha den un ambiente di un dedicacion total na un lucha cu a subscribi  esencia di su bida: e lucha pa Aruba bira un pais autonomo den Reino Hulandes, e lucha pa saca e pueblo Arubano for di su pobreza pa un futuro cu provenir. Su tata Henny Eman sr. tabata pionero di e lucha aki, estadista y fundado di Partido di Pueblo Arubano (AVP), e partido politico mas bieu di Aruba.

            Den e ambiente aki e hoben Shon A mester a tuma un decision pa su bida. Como hoben adolescente el a acepta su herencia. Aruba tabata tin mester di un abogado, un persona prepara pa yuda defende su causa. Su estudio no tabata p’e un porta pa bira un abogado famoso cu un carera briyante. Pa Shon A e estudio di abogado tabata e preparacion cu e mester a haya pa por a duna e base legal na Separacion (afzonderlijke status pa Aruba) y tambe pa e por tabata Abogado di Pueblo, e nomber cu el a haya pa su empeño pa e pueblo Arubano, pa esnan mas humilde.

            Na e edad hoben di 22 aña Shon A Eman a gradua como abogado y a wordo inscribi como abogado na Corte di Husticia. Abogado den Corte pa e homber pober y humilde. Abogado di Aruba: cu a skirbi documentonan legal y a vocifera e lucha pa realisacion di e deseo grandi di Aruba pa haya un Status Aparte den Reino Hulandes. Progreso y equidad social pa e homber chikito, eseñansa pa e

muchanan den tur bario y autonomia pa Aruba y su pueblo ta e aspectonan na cual Shon A a duna su bida.

            E orguyo di ta Arubiano a wordo transmiti cu cada palabra y gesto di Shon A Eman. Na edad di apenas 23 aña Shon A a wordo yama pa prome bes pa sirbi su Pueblo: eligi miembro di Politieraad na 1939 te na 1951. Na 1951 el a keda eligi como miembro di Eilandsraad cu introduccion di autonomia insular (ERNA) y a sirbi como parlamentario insular te día cu el a fayece na 1967.

            E tabata Presidente di AVP di 1957 pa 1967; Lider di fraccion pa su Partido den Eilandsraad y na 1958 a asumi e posicion aki tambe den Staten di Antiyas. Na 1948 Raad van Politie a deleg’e pa entrega na Su Mahestad La Reina e peticion pa Aruba haya su propio Gobierno. Na 1948 e tabata lider di e delegacion Arubano na Conferencia d Mesa Rondo. Durante e conferencua aki, dia 18 di maart 1948, e fecha cu ta recorda te awe como Dia Nacional di Aruba, Shon A Eman a entrega un mocion. Cu acceptacion di e mocion aki e derecho di Aruba pa opta pa un “Afzonderlijke Status” (Status Aparte) pa prome bes a keda reconoci. Shon A a dedica su bida na forma y planifica e futuro nobo di su pais.

            Dia 26 di mei 1967 pueblo a vota na fabor di un combinacion di AVP y UNA/PIA/PRO den Bestuurscollege di Aruba. Na juli 1967 Shon A a mira un soño realisa. Pa prome bes den historia tur diputado den Bestuurscollege tabata yiunan di tera. Poco dia despues, dia 13 di juli 1967, Shon A Eman a fayece inesperadamente. E abogado di Pueblo a muri pober. E no a laga rikeza atras, pero si e herencia di un lucha.

            Shon A tabata casa cu Blanche Hartogh, e tabata tata di ocho (8) yiu. E no a biba pa mira su yuinan crece y bira grandi, pero su memoria a sigi inspira y guia nan. Su yiu homber mayo, mr. Henny Eman, nombra na su abuelo, na aña 1986 a bira e prome Ministro Presidente di Aruba, e pais pa cual tanto Shon A. Eman a lucha y sacrifica su mes pa un Aruba autonomo den Reino Hulandes. Su yiu mas chikito

Mike Eman tambe a sigui su pasonan y mescos cu su tata, abuelo y ruman a bira sirbido di pueblo cu hopi apoyo y admiracion den pueblo y carga su partido pa victorianan historico y realisa cambionan y progreso pa su Pueblo y Pais cu Shon A lo ta orguyoso di dje.

            Shon A no tey mas, pero e a laga atras e herencia di un lucha cu ta pasa di generacion pa generacion pa sirbi Aruba y ta e protector di esnan cu mas mester di proteccion. E lucha di e Abogado di Pueblo !             Dia 13 di juli pa 7’or p.m. na Monumento 18 di Maart lo tin un conmemoracion solemne na memoria di e gran Arubiano Shon Eman, Abogado di Pueblo. Pueblo ta invita pa ta presente pa na e conmemoracion aki.