Shailiny Tromp-Lee cu palabra di pabien pa Corsou y Sint Maarten cu 12 aña di Status Aparte

The content originally appeared on: Diario

ORANJESTAD (AAN) — Parlamentario di Fraccion di MEP, Shailiny Tromp-Lee, a recorda e fecha 10-10-10, como dia 10 di October di 2010, Corsou y Sint Maarten a bira pais; pues, a haya nan status aparte.

Tromp-Lee a expresa cu nan trayectoria ta uno yena cu reto, y e ta contento cu Aruba na un of otro manera a sostene esaki.

Shailiny a felicita, den nomber di fraccion di MEP, e Islanan ruman Corsou y Sint-Maarten cu nan 12 aña di nan Status Aparte. E parlamentario a bisa cu esaki ta algo di celebra. Aruba a haya esaki na aña 1986 y esaki tabata un di e miho decisionnan cu a wordo tuma y desde e momento ey te aworaki, Aruba a bira un pais cu ta desaroya positivamente, a establece un pilar economico cu ta Turismo, na un manera di kita sombre, y cu te dia di awe e ta forma e pilar economico mas importante di nos pais.

“Y nos a demostra cu, con chikito nos por ta, trahando hunto, lorando manga por logra hopi como pais, y nos mester refleha kico nos a logra y uni forza pa hiba nos paisnan dilanti”, Tromp-Lee a remarca.