Servicio Militar Obligatorio como posibel solucion financiero

The content originally appeared on: Diario

Desaroyonan mundial ta crea exigencianan nobo pa Reino

*Gastonan di defensa Reino Hulandes discuti den Parlamento Hulandes

*Hobennan Arubiano lo tabata tin basta reserva contra obligacion 

ORANJESTAD (AAN) — Sigur na e partinan Caribense di Reino, Servicio Militar obligatorio no tabata wordo considera generalmente un obligacion agradabel di e ciudadano Hulandes.

A schrap e ley aki, cu awor ta na discusion atrobe na momento cu e gastonan di defensa Hulandes a subi enormemente.

Durante e dianan aki, e presupuesto di Defensa ta wordo atende den Parlamento Hulandes cu a confirma e temponan sumente dificil cu a wordo crea pa Reino Hulandes dor di e gueranan continuo na nivel mundial.

No ta solamente inseguridad di loke ta pasa na mundo ta causa problema pero tambe e sumanan enorme cu defensa di e pais ta exigi di Reino.

Mayoria den Parlamento Hulandes, sigur tabata di acuerdo cu e situacion insigur mundial, ta exigi pa gasta mas placa na defensa nacional pa Reino Hulandes, di cual Aruba tambe ta forma parti.

Ya e presupuesto Hulandes pa Defensa a wordo aumenta pa alrededor di 21 Miljard Euro, cu ta pone Hulanda den e normanan di e e Alianza Noord Atlantico, NATO cu ta exigi pa dos porciento di e entrada bruto nacional, wordo dedica na defensa.

Pa Hulanda sin mas mester bini inversion debi na e tensionnan mundial grandi.

Ehercito di Hulanda na e momentonan aki no ta den su mihor estado y mester inverti cu placa, cu mester pone disponibel tambe pa atrae mas personal.

Ta den e situacion aki a papia di e posibilidad di Servicio Militar Obligatorio pa homber y muher cu nacionalidad Hulandes, cu den pasado mester a cumpli cu nan deber enfrente nan pais.

Na caminda pa ricibi mucho mas informacion riba e tereno aki, DIARIO ta den consulta directo cu informantenan cu a mustra cu esaki sigur ta uno di e aspectonan cu pa basta dia mester a haya atencion na Aruba tambe.

DIARIO na diferente ocasion a mustra riba e necesidadnan cu seguridad nacional ta exigi mas y mas pero cu ta costa placa.

Servicio militar obligatorio por ta un solucion den e situacion aki? Informacionnan riba cual DIARIO pues ta traha pa motibonan obvio.

Te cu poco tempo pasa, servicio militar obligatorio pa varios hoben lo a significa na prome lugar apertura pa posibilidadnan pa futuro, ya cu a keda demostra cu ademas di situacionnan fastioso, e servicio militar ta habri portanan tambe.

E cambio grandi den pensamento ta bini a base di e desaroyonan mundial di guera, cu ta aumenta e exigencia pa mas militar pero na mes momento ta mustra cu e militar realmente ta pone su bida na riesgo.

E situation mundial di hopi guera ta habri un topico cu a desaparece for di atencion pero den e reunionnan den Parlamento Hulandes, actualmente ta parti di e discusionnan den cual ta busca solucion pa upgrade e ehercito Hulandes di cual e sector di marina, cu ta sirbi e nacion na Aruba, ta forma parti.

Den siman di Carnaval un topico nobo ta pidi atencion y analisis den un Reino, cu cada dia mas y mas ta sinti e peso di e realidadnan nobo di un mundo di cambio!

DIARIO lo sigui informa y analisa hunto cu Aruba.