Serlimar lo keda responsabel pa e recogemento di sushi

The content originally appeared on: Diario

Minister Ursell Arends a splica: *Procesamento di sushi lo ta conhuntamente cu sector priva       

ORANJESTAD (AAN):  Manera a wordo anuncia caba, e intencion di Gobierno ta pa cera e dump di Parkietenbos y relaciona cu esaki, Minister Ursell Arends a duna di conoce cu den cuadro di esaki ta organisando un ‘pitch event’ pa conhuntamente cu sector priva, ‘start-ups’ y cu e ciudadanonan cu tin algun idea pa bay re-dirigi e desperdicio cu ta yegando riba Parkietenbos.

E meta ta pa crea maneranan sostenibel y inovativo pa por procesa esakinan. Por ehempel, pa for di e tairanan por crea otro producto di nan cu por wordo uza localmente of cu por wordo exporta, e mandatario a splica.

Otro companianan local ya caba ta procesando plastic den un escala chikito y tin e matanan (green waste) cu ta yegando riba Parkietenbos, y tin ideanan eyfo tambe riba con pa procesa esaki, reusa esaki den comunidad, Arends a indica.

E minister a enfatisa cu mester ta honesto den e hecho cu no tur desperdicio por bay recicla, pero ta brinda e oportunidad tambe pa exporta esakinan.

Esaki ta e caminda unda ta haci un yamada na comunidad, e companianan pa participa y un bes cu e ‘pitch event’ tuma lugar, cu e companianan aki wordo identifica cual ta esunnan cu ta mihor ekipa pa procesa e desperdicionan aki, gobierno lo sa di facilita e cuadro legal, unda ta introduci un ‘waste policy’ pa asina duna e companianan e oportunidad pa nan maneha e desperdicio, a bisa.

Arends tambe a remarca cu aworaki legalmente Serlimar ta esun cu ta responsabel pa recoge sushi y pa procesa e desperdicio.

Esaki ta caminda ta bay separa cu Serlimar lo keda responsabel pa e recogemento di sushi, pero e procesamento di sushi, lo bay haci esaki conhuntamente cu sector priva pa brinda nan e oportunidad aki y asina crea solucionnan duradero, sostenibel pa Aruba, Minister Arends a agrega.

E meta ta pa cera e dump di Parkietenbos y converti e area aki den un ‘solar energy park’.   Despues di e ‘pitch event’ tuma lugar y cu ta identifica e companianan cu ta bay tuma e responsabilidad pa procesa varios di e desperdicionnan aki, e ora ey lo cera Parkietenbos y lo percura pa converti e area del algo positivo, e minister a duna di conoce.