Senado Hulandes a cera conoci cu e otro banda di medaya

The content originally appeared on: Diario

Prome delegacion di e era nobo den politica Hulandes na Aruba


Gobierno Wever-Croes a expone e berdad di e prestamo di Covid-19
Statuut mester sirbi pa blackmail Aruba of pa bon gobernacion? 

ORANJESTAD (AAN) Uno di e topiconan cu a keda pendiente den Reino na ciere di 2023, cu tabata carga cu acontecimentonan historico, tabata e confrontacion entre Aruba y Gobierno Hulandes basa riba e prestamo cu Hulanda a duna Aruba na momento cu mundo a sorprende pa e Pandemia di Covid-19.

Mientras Aruba mester a topa cu elogio di Reino pa e forma cu Gobierno Wever-Croes a logra cambia e rumbo financiero di Aruba y saca e pais for di desastre cu tabata amenaza pa Florin, Gobierno di Hulanda representa pa Secretario di Estado Van Huffelen, a anuncia cu Aruba mester acepta supervision pa medio di un Ley di Reino, pa e por ricibi un interes favorabel riba pago di e prestamo ricibi pa Covid-19.

Di e forma aki na lugar di elogio, Gobierno Wever-Croes a ricibi un penalty di Gobierno Hulandes.

2024 a habri cu Aruba cu e pregunta grandi, si e gobernacion di Gobierno Wever-Croes lo mester a acepta sin mas cu e logro financiero grandi di Aruba cu a bandona mundo di debe pa awor tin un saldo positivo, mester a wordo castiga dor di Reino cu un medida di supervision of mester a wordo honra segun e espirito di Statuut.

Manera DIARIO a indica, na Hulanda mes cambionan grandi a presenta den mundo politico cu refleho den e representacionnan den tanto Eerste Kamer como Tweede Kamer Hulandes.

Actualmente resultadonan electoral Hulandes, cu ta motibo pa cambionan grandi den gobernacion di Hulanda, ta haya tur atencion mientras formacion di un Gobierno nobo ta continua.

Esaki ta encera cu den Senado (Eerste Kamer) tin caranan nobo.

E delegacion di Eerste Kamer cu tabata na Aruba ta representativo pa e cambionan politico cu tin na Hulanda pero cu tambe ta exigi bon informacion di topiconan, den cual nan mester dicidi.

Gobierno Wever-Croes segun tur informacion cu DIARIO a ricibi a percura pa duna e Senadornan Hulandes cu na 2023 a asumi nan encargo, tur informacion pa asina nan por dicidi den tur honestidad si Aruba merece aplauso pa e forma cu Gobierno Wever-Croes a goberna e pais.

Duranrte e reunion entre e miembronan di Tweede Kamer y Gobierno Wever-Croes e otro banda di e medaya di e sucesonan di 2023 den Reino entorno taza interes pa un prestamo Hulandes, a wordo presenta dor di Gobierno Wever-Croes.

Awor exponentenan di un politica cambio na Hulanda mester duna contenido na e realidad cu a wordo presenta directamente dor di Gabinete Wever-Croes, y cu ta indica cu segun statuut no por a castiga Aruba cu un interes mas halto pa e prestamo di Covid-19.

Tur informacion ta cu e presentacion di Gobierno Wever-Croes a duna e Senadornan Hulandes un bon splicacion cu nan por aplica awor den Eerste Kamer Hulandes, cu tabata e prome organo di gobernacion na Hulanda, cu a conoce cambio na momento cu Hulanda a drenta un era di cambio den su politica!